Նիկոլ Փաշինյան

Մենք չենք կարող նույնիսկ քննարկել «տարածքներ` խաղաղության դիմաց» բանաձևը. Փաշինյան

207
ՀՀ վարչապետ Նիկոլ Փաշինյանը վստահեցնում է` չկա այնպիսի տեղեկություն, որի մասին հանրությունը տեղյակ չլինի։

ԵՐԵՎԱՆ, 30 հունվարի – Sputnik. Մեր կառավարությունը Ղարաբաղի հարցում վարում է մի քաղաքականություն, որը նախկինում ոչ մի կառավարություն չի վարել։ Այսօր րագրողների հետ ճեպազրույցում այս մասին ասաց ՀՀ վարչապետ Նիկոլ Փաշինյանը։

«Նախկինում վարած քաղաքական ուղեգծի հետ որևէ ընդհանրություն գտնելը կատարյալ մոլորություն է»,– ասաց Փաշինյանը։

Նա անդրադարձավ նաև ԱՄՆ նախագահի խորհրդական Ջոն Բոլտոնի հետ հեռախոսազրույցին և Ադրբեջանի նախագահ Իլհամ Ալիևի հետ ոչ պաշտոնական հանդիպումներին։

«Ուզում եմ ևս մեկ անգամ նշել, որ այն, ինչ ասել եմ հրապարակային, բացառված է, որ լինի տեղեկատվություն, և այդ տեղեկատվության վերաբերյալ հանրությունը տեղյակ չլինի։ Բոլտոնի հետ հեռախոսազրույցի ընթացքում Ղարաբաղ կամ Արցախ անունը չի շոշափվել։ Իսկ Ալիևի հետ հանդիպումները բանակցություններ չեն, դրանք ոչ պաշտոնական շփումներ են, որոնց ընթացքում տեղի են ունենում մտքերի փոխանակություն»,– ասաց նա։

Լրագրողները հետաքրքրեցին` Մինսկի խմբի եռանախագահող երկրները չեն առաջարկել արդյոք վերսկսել ղարաբաղյան հիմնահարցի շուրջ բանակցությունները։

Փաշինյանը նշեց, որ այդ հարցը գտնվում է արտգործնախարարների քննարկման օրակարգում։

«Մենք չենք կարող նույնիսկ քննարկել «տարածքներ` խաղաղության դիմաց» բանաձևը»,–շեշտեց նա։

Հիշեցնենք` Բոլտոնի հետ հեռախոսազրույցը տեղի է ունեցել հունվարի 23-ին, երբ ՀՀ վարչապետը Դավոսում էր։ Փաշինյան–Ալիև ոչ պաշտոնական հանդիպումը կայացել է հունվարի 22-ին։

207
թեմա:
ՀՀ վարչապետ Նիկոլ Փաշինյան (791)