Մենք պիտի ամեն ինչ անենք, որպեսզի զինված ուժերում ծառայեն առողջները: Այսօր, Եռաբլուրում, լրագրողների հետ զրույցում, ասաց ՀՀ պաշտպանության նախարար Դավիթ Տոնոյանը՝ անդրադառնալով առողջական խնդիրներով բանակ զորակոչելու մասին դեռ նախկին կառավարության օրոք ընդունված օրենսդրական կարգավորումներին:
«Կառավարության որոշումներով հիմա կարգավորվելու է այդ հարցը: Հիմա մենք սահմանափակումներով ավելի շատ մարդ ենք զորակոչում, ինչը խնդրահարույց է»,- ասաց նախարարը՝ հավելելով, որ այս տարվա ընթացքում կառավարությունը փորձելու է առողջական ոչ լուրջ խնդիրներով զինակոչիկների համար ծառայության նոր ձևաչափ գտնել:
Ինչ վերաբերում է բանակում առկա ոչ կանոնադրական հարաբերություններին ու քրեական կարգերին, Տոնոյանը վստահեցրեց, որ ամեն ինչ արվում է դրանք արմատախիլ անելու համար: Նրա խոսքով`այդ նպատակին են ուղղված նաև բանակում կատարվող փոփոխությունները:
