ԵՐԵՎԱՆ, 25 հունվարի — Sputnik. Արարատի մարզպետ Գարիկ Սարգսյանը գյուղապետների դեմ արշավանքն ավարտելուց հետո անցել է դպրոցի տնօրեններին։ Այս մասին գրում է «Հրապարակ» օրաթերթը` նշելով, որ մարզից տեղեկություններ է ստանում, թե մարզպետն ամեն գնով աշխատանքից ազատում է բոլոր ոչ յուրային տնօրեններին, առաջնահերթության կարգով՝ նրանցից, ովքեր ծառայել են նախկին իշխանություններին կամ ունեն մտերիմ կապ նրանց հետ։
«Հրապարակը» գրում է նաև կոնկրետ դեպքերի մասին։ Օրինակ` Սիսավանի տնօրեն Նարինե Գալստյանի աշխատանքային ժամկետն ավարտվել է, սակայն, ըստ տեղեկությունների, Գարիկ Սարգսյանը զգուշացրել է՝ հանկարծ մտքով չանցնի նորից մրցույթին մասնակցել, քանի որ Գալստյանն «Ավշարի» Գրիգորյանների մտերիմն է։
Մոտ մեկ շաբաթ առաջ էլ Արարատի թիվ 1 դպրոցի տնօրենի համար հայտարարված մրցույթի ժամանակ է խոչընդոտներ ստեղծել, որ կառավարությունը նշանակի իր հովանավորյալին։ Դպրոցի խորհրդի անդամներից երկուսն արդեն որերորդ անգամ անհարգելի պատճառով ներկա չեն գտնվել նիստին, թեկնածուները եղել են երեքը` Նելլի Ղազարյան, Հայկ Խանոյան և Վահրամ Մանուկյան։ Վերջինը մարզպետ Գարիկ Սարգսյանի հովանավորյալն է:
Հունվարի 18-ին էլ մարզպետի կարգադրությամբ աշխատանքից ազատվել է Բյուրավանի միջնակարգ դպրոցի տնօրեն Նվարդ Մելիքյանը, որին 2 նկատողություն է տվել ու, այսպես ասած, «օրինական» ձևով ազատել:
