Մանվել Գրիգորյանի գործով դատական նիստ

Աղմկահարույց դատական գործեր. իրավաբանը` փաստաբանների վրա ճնշում գործադրելու ռիսկերի մասին

106
Հայ փաստաբանների հասցեին սպառնալիքներ հնչեցնելը, նրանց հալածելը հետընթաց է իրավական պետության զարգացման և կայացման մեջ, կարծում է իրավաբան Արմինե Ֆանյանը։

ԵՐԵՎԱՆ, 23 հունվարի — Sputnik. Հայաստանում աննախադեպ ճնշում է գործադրվում այն փաստաբանների վրա, որոնք պաշտպանում են մարդու իրավունքներն աղմկահարույց հարցերում։ Այսօր մամուլի ասուլիսին նման կարծիք հայտնեց փաստաբան Արմինե Ֆանյանը` պատասխանելով Sputnik Արմենիայի հարցին։

Փաստաբանների պաշտպանության խնդիրն արդիական է դարձել մի քանի աղմկահարույց գործերից հետո, մասնավորապես, Հայաստանի նախկին նախագահ Ռոբերտ Քոչարյանի, նախկին պատգամավոր Մանվել Գրիգորյանի գործերի դեպքում։ Այսպես` Մանվել Գրիգորյանի գործով վերջին դատական նիստերից մեկի ընթացքում դատարանի շենքի մոտ հավաքված քաղաքացիները, որոնք պահանջում էին գեներալի կրկնակի կալանավորումը, հարձակվել են նրա փաստաբան Արսեն Մկրտչյանի վրա, ներկ լցրել նրա ավտոմեքենայի վրա։

Ֆանյանի կարծիքով, երբ քաղաքացիները ճնշում են գործադրում դատական գործընթացի մասնակիցների վրա, մեծ ռիսկեր կան, որ կայացվելիք դատավճիռը սուբյեկտիվ կլինի, այն կկայացվի հօգուտ այդ մարդկանց։

Իրավաբանի կարծիքով` այդ ճնշումը կապված է մարդկանց մոտ իրավական գիտակցության ցածր մակարդակի, փաստաբանի տեղի, նշանակության և դերի սխալ ընկալման հետ։ Փաստաբանների հասցեին սպառնալիքները, նրանց հալածելը հետընթաց է իրավական պետության զարգացման և կայացման մեջ, կարծում է իրավաբանը։

Նրա խոսքով` փաստաբանը երբեք չպետք է նույնացվի պաշտպանյալի հետ։ Բայց այսօր ակնհայտ է, որ փաստաբանների նկատմամբ բացասական վերաբերմունքը պայմանավորված է այն մարդկանց բացասական ընկալմամբ, որոնց շահերը պաշտպանում են փաստաբանները։

«Անշուշտ, հասարակության ձայնը, նրա դժգոհությունն այս կամ այն քրեական գործընթացով պետք է հաշվի առնվի համապատասխան ատյանների կողմից։ Մարդիկ իրավունք ունեն արտահայտել իրենց կարծիքը, այդ ազատությունը երաշխավորված է սահմանադրությամբ։ Բայց այդ իրավունքի իրագործումը պետք է ավարտվի այնտեղ, որտեղ սկսվում են այլ մարդկանց իրավունքները», – ասում է Ֆանյանը։

Փաստաբանները քրեական գործընթացի ընթացքում ունեն համապատասխան երաշխիքներ, և ոչ ոք չպետք է վիճարկի այդ երաշխիքը։

106
Ըստ թեմայի
Քոչարյանը քաղբանտարկյա՞լ է. փաստաբանները հայց կներկայացնեն Եվրոպական դատարան
Մայրապետյանի փաստաբանները հակադարձում են՝ Դատախազությունն ապատեղեկատվություն է տարածում
Ռոբերտ Քոչարյանի պաշտպանական խումբը հայտարարություն է տարածել