Արայիկ Հարությունյան

Անակնկալ այց դպրոց և մանկապարտեզ. ի՞նչ է պարզել ԿԳ նախարարի պաշտոնակատարը

346
(Թարմացված է 18:19 10.01.2019)
Դպրոցներում ու մանկապարտեզներում գրիպի ու սուր շնչառական վարակների տարածվածության մակարդակը պարզելու համար Արայիկ Հարությունյանն առանց նախազգուշացման այցելել է կրթական հաստատություններ։

ԵՐԵՎԱՆ, 10 հունվարի — Sputnik. ԿԳ նախարարի պաշտոնակատար Արայիկ Հարությունյանն այսօր առանց նախապես տեղեկացնելու այցելել է մեկ ավագ դպրոց ու մեկ մանկապարտեզ` ստուգելու դրանցում գրիպի ու սուր շնչառական վարակների տարածվածության իրական մակարդակը։

Այս մասին Հարությունյանը հայտնել է իր ֆեյսբուքյան էջում տեղադրված տեսանյութում։

«Դպրոցում բացակաները շատ չէին։ Ըստ տնօրենի` իրենք զանգահարել են բացակա աշակերտների տուն ու պարզել, որ նրանց փոքր թիվն է հիվանդ։ Արձանագրեցի, որ այդ ավագ դպրոցում կարգապահության հետ կապված խնդիր կա։ Ես գնացի առավոտյան ժամը 9-ին մոտ, աշակերտները դեռ նոր էին գալիս, այն դեպքում, երբ դասերը 8։30 են սկսվում»,– հայտնում է Հարությունյանը։

Մանկապարտեզ նախարարի պաշտոնակատարն այցելել է Մալաթիա–Սեբաստիա վարչական շրջանում։ Նրա խոսքով` այս մանկապարտեզը նորոգման կարիք է ունեցել, միջանցքներում ցուրտ է եղել, խմբերում` 19-20 աստիճան, մեկ խմբում` 18։

«Հիվանդ էր բացակայողների 10-15 տոկոսը։ Ծնողները երեխաներին չեն բերում մանկապարտեզ, ինչը, տնօրենի խոսքով, հետտոնական շրջանում սովորական երևույթ է, իսկ որոշ ծնողներ տնօրենին ասել են, որ երեխաներին չեն բերում, քանի որ համացանցում աղմուկ կա, թե վիրուսներ ու տարբեր տեսակի գրիպներ են տարածված»,– ասում է Հարությունյանը։

Բայց թե՛ դպրոցների և թե՛ մանկապարտեզների տնօրենները համոզմունք են հայտնել, որ հաջորդ շաբաթ հաճախող երեխաների թիվը կավելենա։

Առաջիկայում նախարարի պաշտոնակատարը խոստանում է այցելել նաև մարզային կրթական հաստատություններ` մինչ այդ հայտարարելով, որ տեղյակ է, որ դրանցում երբեմն բավական ցուրտ է լինում։

Ինչ վերաբերում է հիվանդություններին, նախարարը հայտարարում է, որ ներկա իրավիճակում դասերը հետաձգելու կամ մանկապարտեզները փակելու կարիք չկա։

Առողջապահության նախարարության պաշտոնական տվյալներով` միայն հունվարի 9-ին դրությամբ Հայաստանի դպրոցներից և մանկապարտեզներից շնչառական վարակներին բնորոշ գանգատներով տուն է ուղարկվել 387 երեխա` 129–ը` Երևանում, 258-ը` մարզերում։

346
թեգերը:
Հայաստան, Արայիկ Հարությունյան
Ըստ թեմայի
Սուր շնչառական վարակներով հոսպիտալացված է 541 մարդ. Թորոսյանն այցելել է բուժհիմնարկներ
Լիանա Թորոսյան. «Հանրապետությունում շրջանառվում է գրիպի H1N1 տեսակը»
Հայաստանում գրանցվել է H1N1 գրիպի 10 դեպք. ինչպես խուսափել. նախարարության հորդորը