Արամ Հարությունյան

Որտե՞ղ է թաքնվել Արամ Հարությունյանը. քննիչներին չի հաջողվել գտնել նրան

990
ՀՀ գլխավոր դատախազությունը պատգամավոր Արամ Հարությունյանին անձեռնմխելիությունից զրկելն անհետաձգելի է համարում։ Կաշառքի ու փողերի լվացման մեջ մեղադրվող նախկին նախարարը կարող է թաքնված լինել արդարադատությունից։

ԵՐԵՎԱՆ, 4 դեկտեմբերի — Sputnik. ԱԺ ՀՀԿ խմբակցության պատգամավոր, բնապահպանության նախկին նախարար Արամ Հարությունյանի նկատմամբ հարուցված քրեական գործի նախաքննությունն իրականացնող քննիչին չի հաջողվել կապ հաստատել նրա հետ ու հրավիրել քննչական մարմին։ Այս մասին տեղեկացնում է ՀՀ գլխավոր դատախազությունը` նշելով, որ վարույթն իրականացնող մարմինն Արամ Հարությունյանի թաքնվելու վերաբերյալ կասկածներ ունի:

Գլխավոր դատախազությունը հենց այս հանգամանքով է մեկնաբանում Հարությունյանին պատգամավորական անձեռնմխելիությունից զրկելու և նրա նկատմամբ կալանավորումը որպես խափանման միջոց կիրառելու նպատակով միջնորդություններ ներկայացնելու հրատապությունը։

«Գործընթացի հրատապությունը պայմանավորված է քրեական գործի նախաքննության լրիվությունը, օբյեկտիվությունն ու բազմակողմանիությունը, քննության հետագա բնական ընթացքն ապահովելու և դրանց շրջանակներում քրեական դատավարության մասնակցի պատշաճ վարքագիծն ապահովելու ուղղությամբ միջոցներ ձեռնարկելու օբյեկտիվ անհրաժեշտությամբ»,– ասված է դատախազության տարածած հաղորդագրության մեջ։

Միաժամանակ Գլխավոր դատախազությունը պատգամավորներին խնդրում է ապահովել ՀՀ գլխավոր դատախազի համապատասխան միջնորդությունների սահմանված կարգով քննարկումը և ձեռնպահ մնալ հանրային թյուր կարծիք ձևավորելուց ու Դատախազության և քրեական հետապնդման մյուս մարմինների գործունեության նկատմամբ քաղաքական ճնշում գործադրելուց։

Արամ Հարությունյանին պատգամավորական անձեռնմխելիությունից զրկելու միջնորդությունը ՀՀ Գլխավոր դատախազն ԱԺ նախագահին էր ներկայացրել երեկ։ Այդ հարցը ներառվել էր քառօրյա հերթական նիստերի օրակարգ և նախատեսված էր քննարկել այսօր առավոտյան` 10։ 00–ին մեկնարկող նիստում։ Նիստը քվորումի բացակայության պատճառով չկայացավ, հարցի քննարկումը հետաձգվեց մինչև վաղը։

Հիշեցնենք` ՀՀ գլխավոր դատախազությունը երեկ հայտարարել էր, որ 14 մլն դոլար կաշառքի ու այդ փողերի լվացման փաստով հարուցված քրեական գործով մեղադրանք է ներկայացվել ԱԺ ՀՀԿ խմբակցության պատգամավոր, նախկին բնապահպանության նախարար Արամ Հարությունյանին։ Գլխավոր դատախազը դիմել էր ԱԺ նախագահին` Արամ Հարությունյանին անձեռնմխելիությունից զրկելու հարցով ԱԺ արտահերթ նիստ հրավիրելու միջնորդությամբ:

990
Ըստ թեմայի
Արամ Հարությունյանի շուրջ օղակը սեղմվում է. «Ժողովուրդ»
Փաշինյանը կասկածում է, որ Արամ Հարությունյանը 14 մլն դոլարը դրել է գրպանն ու պտտվել