Գառնի

Ով է ավելի շատ աղտոտում Էջմիածինը, և ինչ է խոստանում Հայաստանի լավագույն գյուղի ղեկավարը

93
Հայաստանում տեղական ինքնակառավարման համակարգը 22 տարեկան է։ Ավանդական մրցանակաբաշխությամբ որոշվեցին Հայաստանի լավագույն գյուղերն ու քաղաքները։

ԵՐԵՎԱՆ, 10 նոյեմբերի — Sputnik. Հայաստանի լավագույն քաղաքը Սևանն է, լավագույն գյուղը` Գառնին։ Նման որոշում են կայացրել Հայաստանում տեղական ինքնակառավարման օրվա կապակցությամբ կազմակերպված «Տարվա լավագույն համայնք» մրցանակաբաշխության կազմակերպիչները։

Տարվա ամենաբարեկարգ համայնք են ճանաչվել Գորիսն ու Տաշիրը, ամենամաքուր համայնքներ` Էջմիածինն ու Գավառը։ Գյումրին ու Փարաքարը լավագույն մշակութային համայնքներն են, Իսկ Արտաշատն այս տարվա լավագույն ֆրանկոֆոն համայնքն է։

Գյումրու քաղաքապետ Սամվել Բալասանյանը, խոսելով ստացած մրցանակի մասին, ասաց, որ այն իր համար անակնկալ չէր։

«Գյումրին ընդհանրապես մշակութային մայրաքաղաք է, դուք գիտեք, որ Գյումրին ԱՊՀ մշակութային մայրաքաղաքն է։ Մշակույթի ակունքները հոսում են Գյումրիից։ Այսօր պատահական չէ, որ Գյումրի մշակութային քաղաքը շարունակում էիր դիրքերն ամրացնել»,– ասաց նա։

Մաքուր քաղաք ճանաչված Էջմիածնի քաղաքապետ Դիանա Գասպարյանը Sputnik Արմենիային հայտնեց, որ հեղափոխությունից հետո մաքրվել են քաղաքի ոչ միայն փողոցները, այլև մթնոլորտը։

«Վախի մթնոլորտ այլևս չկա, Էջմիածինը հանգիստ է, հասարակ էջմիածինցին ժպտում է» ,– ասաց նա։ Իսկ ինչ վերաբերում է քաղաքի փողոցներում թափված աղբին, նորընտիր համայնքապետը խոստովանեց, որ Էջմիածինը մաքուր է եղել նաև նախկին ղեկավարի օրոք։ Այդուհանդերձ, քաղաքում այս ուղղությամբ անելիքներ շատ կան։ Բայց ամենացավալին քաղաքապետի համար այն է, որ քաղաքն ավելի շատ աղտոտում են հենց տեղացիները և ոչ թե քաղաք այցելող բազմաթիվ զբոսաշրջիկները։

Լավագույն գյուղական համայնք ճանաչված Գառնու գյուղապետ Ահարոն Սահակյանը վստահեցրեց` Գառնիում ու մասնավորապես քարերի սիմֆոնիայի հարակից տարածքում ապօրինի շինարարության դեմ պայքարն ավարտված է։

«Պայքարել, վերջացրել ենք, մեկ անգամ է շինարարություն եղել, ապօրինի է եղել, ապամոնտաժվել է, ու վերջ»,– ասաց Ահարոն Սահակյանը։

«Տարվա լավագույն համայնք» մրցանակաբաշխությունը «Հայաստանի համայնքների միությունն» ու ՀՀ տարածքային կառավարման և զարգացման նախարարությունը կազմակերպում են 2006 թվականից` որպես համայնքների գնահատման ու խրախուսման լավ միջոց։

Մրցանակաբաշխությունն ավանդաբար անցկացվում է Հայաստանում տեղական ինքնակառավարման օրը` նոյեմբերի 10-ին։

Հայաստանում տեղական ինքնակառավարման համակարգը սկզբնավորվել է 1996թ–ից և այս տարի նշում է իր 22-ամյակը՝ «Նոր Հայաստանում՝ նորացված համայնքներ» կարգախոսով:

93
Ըստ թեմայի
Վանոյի գրածներն են կարդացել, Հախվերդյանին են տեսել. կրակոցների և ծաղիկների մեջ ապրող Կոթին
Արքայանարինջ և բուլկի. ինչպես են Տավուշի բնակիչներն իրագործում իրենց բիզնես գաղափարները
Առուշանյան. «Երբ հրաժարվեմ, կտեղեկացնեմ»