ԵՐԵՎԱՆ, 16 հոկտեմբերի — Sputnik. Յոթ օրից Հայաստանում կմեկնարկի «Եվրասիական շաբաթ» երրորդ համաժողովը։ Եվրասիական տնտեսական միության տարածքում անցկացվող խոշորագույն գագաթնաժողովը կանցկացվի Երևանում հոկտեմբերի 22-24-ը։
Համաժողովին մասնակցելու համար մասնակիցներ են գրանցվել Հայաստանից, Ռուսաստանից, Աֆղանստանից, Բելառուսից, Հունգարիայից, Գերմանիայից, Վրաստանից, Իրանից, Իտալիայից, Ղազախստանից, Կամբոջայից, Ղրղըզստանից, Չինաստանից, Լիտվայից, Մոլդովայից, Նիգերիայից, Նիդեռլանդներից, Արաբական Միացյալ Էմիրություններից, Միացյալ Թագավորությունից, ԱՄՆ-ից, Տաջիկստանից, Ուզբեկստանից, Շվեյցարիայից, Կատարից, Ֆրանսիայից, Արգենտինայից, Իսպանիայից, Ուկրաինայից:
«Եվրասիական շաբաթ» գործարար համաժողովի մեկնարկից մեկ շաբաթ առաջ իրենց մասնակցությունը հաստատել են ավելի քան 2 հազար մասնակից, 150 խոսնակ, որոնց թվում են նաև փոխվարչապետներ և նախարարներ, պետական ընկերությունների ղեկավարներ, ԵԱՏՄ անդամ երկրների բիզնես ոլորտի ներկայացուցիչներ:
Համաժողովին մասնակցելն անվճար է։ Պետք է գրանցվել eurasianweek.com կայքում։
