ԵՐԵՎԱՆ, 16 հոկտեմբերի — Sputnik. ԱԱԾ–ն առաջիկայում տեսանյութ կտարածի Երևանի «Կոնգրես» հյուրանոցի իրական սեփականատերի մասին։ Այս մասին այսօր կառավարության նիստից հետո լրագրողների հետ զրույցում հայտարարեց ԱԱԾ տնօրեն Արթուր Վանեցյանը` ի պատասխան լրագրողների դիտարկման, թե որոշ ժամանակ առաջ նա հայտարարել էր այդ հյուրանոցի հետ ՀՀ երկրորդ նախագահ Ռոբերտ Քոչարյանի կապի մասին։
Իսկ մինչ այդ, ՊԵԿ նախկին նախագահ Արմեն Ավետիսյանի ընտանիքին պատկանող հյուրանոցների մասին հրապարակված տեսանյութում Ռոբերտ Քոչարյանի հետ կապված ակնարկը Արթուր Վանեցյանն այսպես մեկնաբանեց. «Մենք չենք ասել, որ Քոչարյանի ընտանիքը կապված է այդ հյուրանոցների հետ։ Մենք ներկայացրել ենք այն, ինչ ներկայացրել ենք` շատ պարզ և հստակ։ Բոլորը տեսել են»։
Ինչ վերաբերում է Արմեն Ավետիսյանին, Արթուր Վանեցյանը նշեց, որ նա ԱԱԾ քննչական վարչություն է հրավիրվել որպես վկա։ Իսկ թե ինչ կարգավիճակ ունի այս պահին` տեղյակ չէ, փոխարենը տեղյակ է գործի նյութերից։
«Օֆշորային գոտիների այդ հյուրանոցները գրանցված են Արմեն Ավետիսյանի մոր և որդու անուններով։ Դա հաստատված փաստ է, որ նախկինում ներկայացվել է որպես Կիպրոսից ներդրում։ Այն, որ Արմեն Ավետիսյանն իր ներկայացրած գումարների մեջ չունի այն գումարները, որոնցով կառուցվել են այդ հյուրանոցները, դա արդեն բավական հիմք է այդ մարդուն մեղադրանք ներկայացնելու համար»,– ասաց նա` հիշեցնելով, որ քրեական գործի նախաքննությունը հանձնարարվել է ՀՔԾ–ին։
Հիշեցնենք` Հայաստանի Հանրապետության ազգային անվտանգության ծառայության քննչական վարչությունում հարուցվել է քրեական գործ ՀՀ մաքսային պետական կոմիտեի նախկին նախագահ Արմեն Ավետիսյանի կողմից ձեռնարկատիրական գործունեությանն ապօրինի մասնակցելու և հանցավոր ճանապարհով ստացված առանձնապես խոշոր չափերով գումարներն օրինականացնելու (փողերի լվացում) դեպքի առթիվ` նախատեսված ՀՀ քրեական օրենսգրքի 310-րդ հոդվածով և 190-րդ հոդվածի 3-րդ մասի 1-ին կետով: Այս մասին տեղեկացնում են ԱԱԾ մամլո ծառայությունից:
