ԵՐԵՎԱՆ, 24 սեպտեմբերի — Sputnik. ՀՀ պաշտպանության նախարար Դավիթ Տոնոյանն այսօր այցելել է Մուրացանի կենտրոնական հոսպիտալ։ Facebook սոցիալական ցանցի իր էջում գրել է ՊՆ մամուլի քարտուղար Արծրուն Հովհաննիսյանը:
«Նախարարն առաջին հերթին այցելել է առաջնագծում վիրավորված զինծառայող շարքային Գևորգյան Արթուրին»,- գրել է նա։
Տոնոյանն Արթուրի առողջական վիճակի մասին խոսել է բժիշկների հետ, հանդիպել ծնողներին։
Արթուր Գևորգյանի վիճակն այս պահին կայուն է։
Տոնոյանը շրջել է հոսպիտալում, հանդիպել այլ հիվանդներին, ռազմաբժշկական վարչության պետ Գայանե Հովհաննիսյանի և հոսպիտալի պետի հետ քննարկել հոսպիտալում բուժման կազմակերպման հետ կապված հարցեր։
Նշենք, որ զինծառայող, Վանաձորի բնակիչ, 20-ամյա Արթուր Գևորգյանը ծանր վիրավորվել է սեպտեմբերի 20-ին Մատաղիսում զինվորական հերթապահություն անցկացնելիս:
