ԵՐԵՎԱՆ, 13 սեպտեմբերի — Sputnik. Չնայած Հայաստանի վարչապետի հայտարարությանը` Մոսկվայի և Երևանի հարաբերությունները դժվար է «փայլուն» անվանել, Sputnik Արմենիա մամուլի կենտրոնում ասաց քաղտեխնոլոգ Կարեն Քոչարյանը։
«Ես, մեղմ ասած, համաձայն չեմ վարչապետ Նիկոլ Փաշինյանի հետ այն հարցում, որ մենք փայլուն հարաբերություններ ունենք Ռուսաստանի, ԱՄՆ-ի, Եվրամիության և այլ աշխարհաքաղաքական խաղացողների հետ։ Այդ դեպքում ինչ-որ քայլեր կլինեին, իսկ ես դրանք չեմ տեսնում այս երկրներից», — ասաց Քոչարյանը։
Նրա խոսքով` Վրաստանի հետ խնդիրներ կան հացահատիկի ցամաքային տեղափոխության հարցում։ Կարևորագույն հարևանի և գործընկերոջ` Իրանի հետ Հայաստանը նույնպես ինչ-որ առաջխաղացում չունի։
Բացի այդ, ամբողջ աշխարհը փորձում է հարաբերությունները կարգավորել Չինաստանի հետ։ Նրա խոսքով` Հայաստանի նախկին իշխանությունների օրոք դրանք նույնպես այդքան սերտ չեն եղել, բայց հիմա այդ ուղղությամբ պետք է աշխատել։
Ինչ վերաբերում է Փաշինյանի ռուսաստանյան այցին, ապա դրա արդյունքներն առայժմ տեսանելի չեն։ Ռուսական ԶԼՄ-ներում այդ կապակցությամբ առայժմ ուղերձներ չկան։
«Այդ լռությունը նույնպես անհանգստացնում է ինձ։ Լավ լուրեր չկան, թեև վատ լուրեր էլ չկան», — ասաց Քոչարյանը։
Ռուսաստանի նախագահ Վլադիմիր Պուտինի հայաստանյան այցը, որի մասին հայտնել է նրա մամուլի քարտուղարը, շատ բան կարող է նշանակել։
Բայց շատ բան կախված է ժամանակից։ Պուտինը կհանդիպի՞ միայն այսօրվա իշխանությունների, թե՞ նաև նախկին ղեկավարության հետ։
«Դրանից կախված կլինի այցի նշանակությունը», — նշեց Քոչարյանը։
Քաղտեխնոլոգի խոսքով` Հայաստանի ներքին և արտաքին քաղաքականությունում առկա խնդիրները պայմանավորված են փորձի բացակայությամբ։ Դա հաշվի առնելով` կարելի է սովորել առանց կորուստների ունենալ լավ խորհրդականներ, փորձառու մասնագետներ և տեղակալներ։ Գոյություն ունեն նման լուծումներ և ձևաչափեր, միջազգային պրակտիկայում դա անցած փուլ է։
ՀՀ վարչապետ Նիկոլ Փաշինյանն ու Ռուսաստանի նախագահ Վլադիմիր Պուտինը հանդիպել են 2018 թվականի սեպտեմբերի 8-ին։ Հայաստանի իշխանափոխությունից հետո սա նրանց երրորդ հանդիպումն էր։ ՀՀ վարչապետը Պուտինի հետ հանդիպումից հետո հայտնեց, որ Հայաստանն ու Ռուսաստանը շուտով Սիրիայում համատեղ հումանիտար ծրագիր են իրականացնելու, որի հիմնական նպատակը Հալեպի և ընդհանրապես Սիրիայի հայ համայնքին աջակցելն է։
Փաշինյանն ընդգծեց` Հայաստանն իրականացնելու է բժշկական և հումանիտար ականազերծման առաքելություն։
