ԵՐԵՎԱՆ, 31 օգոստոսի — Sputnik. 100 օրվա ընթացքում նույնիսկ սերմը չի հասցնում հասունանալ: Այսօր, ամփոփելով իր պաշտոնավարման 100 օրը, ասաց ՀՀ գյուղատնտեսության նախարար Արթուր Խաչատրյանը:
Որպես ոլորտի հիմնական խնդիրներ նախարարն իր պաշտոնավարման ընթացքում առանձնացրել է հողերի կտրտվածությունը, տեխնիկայի մաշվածությունը, ոռոգման ցանցի քայքայվածությունը, անասնագլխաքանակի մասնատվածությունը, գյուղատնտեսական խորհրդատվական կենտրոնների անկատարությունը, գյուղատնտեսական ներքին շուկայի սահմանափակությունը և արտաքին արտահանման շուկայի կենտրոնացվածություն:
«Այս ամենը բերել է նրան, որ գյուղատնտեսությունը դարձել է ոչ եկամտաբեր ու ռիսկային զբաղմունք»,-ասաց նախարարը` հավելելով, որ դրա հետևանքով գյուղացին լքում է գյուղն ու նաև երկիրը:
Նոր կառավարությունը գյուղատնտեսության աջակցությունը տեսնում է ոչ թե սոցիալական աջակցության բնագավառում, այլ արդյունավետության ու եկամտաբերության բարձրացմանը միտված ծրագրերի իրականացման մեջ: Դրանցից հիմնականը հողերի խոշորացման ծրագրերն են` սեփականության իրավունքի պահպանմամբ: Կառավարությունը մտադիր է նաև աջակցել խոշորացված հողօգտագործողներին` ապահովելով նրանց կաթիլային ոռոգման համակարգով:
Գյուղնախարարությունը մտադիր է բարձրացնել նաև խորհրդատվական ծառայությունների մակարդակը` ուղղված մշակաբույսերի դիվերսիֆիկացմանն ու հողերի ճիշտ օգտագործմանը:
