ԵՐԵՎԱՆ, 29 օգոստոսի – Sputnik. Չարաշահումներ են բացահայտվել Երևանի թիվ 46 ավագ դպրոցում. մեղադրանք է առաջադրվել դպրոցի նախկին տնօրենին։ Այս մասին հայտնում է ՀՀ քննչական կոմիտեի մամուլի ծառայությունը։
Մինչդատական վարույթում ձեռնարկված մեծածավալ քննչական գործողությունների արդյունքում բավարար փաստական տվյալներ են ձեռք բերվել առ այն, որ Երևանի թիվ 46 դպրոցում տարբեր հաստիքների վրա ձևակերպվել են նախկին տնօրենի ընտանիքի անդամները, ովքեր աշխատանքի չեն ներկայացել, սակայն նրանց անունով ձևակերպվել են աշխատավարձեր: Առերևույթ չարաշահումները տեղի են ունեցել 2010-2017 թթ., որոնց հետևանքով պետությանը պատճառված վնասը գնահատվել է 7.651.346 ՀՀ դրամ։
Ձեռք բերված ապացույցների հիման վրա՝ դպրոցի նախկին տնօրենին մեղադրանք է առաջադրվել ՀՀ քրեական օրենսգրքի 179-րդ հոդվածի 3-րդ մասի 1-ին կետով (առանձնապես խոշոր չափերի յուրացում): Վերջինս իրեն մեղավոր է ճանաչել և ամբողջությամբ վերականգնել պատճառված վնասը՝ 7.671.346 ՀՀ դրամ գումարը վճարելով ՀՀ ՔԿ դեպոզիտ հաշվեհամարին։
Նախաքննությունը շարունակվում է։
