ԵՐԵՎԱՆ, 28 օգոստոսի — Sputnik. Ոստիկանության պետը շարունակում է աշխատել բնականոն աշխատակարգով և ունի բազմաթիվ երկարաժամկետ ծրագրեր, որոնք իրականացվում և իրականացվելու են կանխանշված ժամկետներում: Այս մասին հայտարարություն է տարածել ՀՀ ոստիկանությունը։
Ոստիկանության լրատվական ծառայությունն արձագանքել է այսօր մամուլում հրապարակված լուրերին, թե ոստիկանապետը հոկտեմբերին հրաժարական է տալու։
Օսիպյանի`Եվրոպայում բնակություն հաստատելու մտադրության մասին տեղեկություններին ոստիկանությունն այսպես է արձագանքել. «Ընդամենը ի գիտություն ասենք, որ մեր հայրենակիցներն այսօր Եվրոպայից տուն են վերադառնում, և այս կարգի «պատումները» ծիծաղելի ու ժամանակավրեպ են»:
Ոստիկանությունը կոչ է անում ձեռնպահ մնալ «անհավաստի լուրերով ընթերցողին թյուրիմացության մեջ գցելու գործելակերպից»։
Օսիպյանի` հոկտեմբերին սպասվող հրաժարականի մասին այսօր գրել էր «Իրավունք» օրաթերթը։ Ըստ պարբերականի` մինչ Նիկոլ Փաշինյանի իշխանափոխությունը, ոստիկանական կուլիսներում արդեն իսկ շշուկներ կային, որ Օսիպյանը պատրաստվում է բնակություն հաստատել Եվրոպայում։
