ԵՐԵՎԱՆ, 24 օգոստոսի — Sputnik. ՀՀ ԶՈՒ գլխավոր շտաբի պետ, գեներալ-մայոր Արտակ Դավթյանը պատասխանել է այն մարդկանց, որոնք մեղադրում են ՀԱՊԿ գլխավոր քարտուղար Յուրի Խաչատուրովին։ Դավթյանի գրավոր մեկնաբանությունը հրապարակվել է Facebook-ում։
Հիշեցնենք, որ 2016 թվականի ապրիլյան քառօրյայի ժամանակ ՀԱՊԿ գլխավոր քարտուղարը ՀՀ ԶՈՒ Գլխավոր շտաբի պետն էր։ Խաչատուրովի հասցեին մինչ օրս մեղադրանքներ են հնչում այն մասին, որ բարձրաստիճան զինվորականը համապատասխան միջոցներ չի ձեռնարկել` իմանալով ղարաբաղյան հակամարտության գոտում մարտական գործողությունների բռնկման մասին։
Միևնույն ժամանակ, ի պատասխան փաստաբանական գրասենյակներից մեկի պաշտոնական հարցման, Արտակ Դավթյանը գրում է, որ 2016 թվականի ապրիլի 2-ին ՀՀ ԶՈւ գլխավոր շտաբի պետ Յուրի Խաչատուրովը, ստանալով տեղեկատվություն հակառակորդի` Ադրբեջանի Հանրապետության ԶՈՒ նախահարձակ գործողությունների մասին, 20-25 րոպե հետո` ժամը 03։10-03։15 սահմաններում ներկայացել է ծառայության վայր և զինված ուժերի կառավարումը իրականացրել անմիջապես իր կառավարման կետից։ Դավթյանը նաև գրում է, որ նշված պատասխանի հիմնավորող փաստաթղթերի պատճեները չեն կարող տրամադրել, քանի որ պարունակում են գաղտնի տեղեկություններ։
Օգոստոսի 23-ին հայտնի դարձավ, որ ՀԱՊԿ գլխավոր քարտուղար Յուրի Խաչատուրովը քաղհայց է ներկայացրել ընդդեմ քաղաքագետ Ստեփան Գրիգորյանի։ Հարցազրույցներից մեկի ժամանակ Գրիգորյանը Խաչատուրովին մեղադրել է, որ վերջինս 2016 թվականի ապրիլյան քառօրյայի ժամանակ իր պարտականությունները չի կատարել։ Այժմ Խաչատուրովը Գրիգորյանից հանրային հերքում է պահանջում, ինչպես նաև իր պատվի և արժանապատվության բարոյական վնասի փոխհատուցում։
Ղարաբաղյան հակամարտությունը սրվել է 2016 թվականի ապրիլի 2-5-ն ընկած ժամանակահատվածում։ Երևանը հայտարարել էր, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարել էր, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։
Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։
Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.-ի զինադադարի և 1995թ.-ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։
