Զինծառայողներ

Ժամկետային զինծառայողները այսուհետ կարող են իրենց մոտ ունենալ հեռախոս, բայց մի պայմանով

280
(Թարմացված է 11:52 17.08.2018)
ՀՀ ՊՆ–ն ներկայացնում է ժամկետային զինծառայողների` բջջային հեռախոս պահելու և դրանից օգտվելու հատուկ կանոնները։

ԵՐԵՎԱՆ, 17 օգոստոսի — Sputnik. ՀՀ ՊՆ-ի նոր կանոնակարգով ժամկետային զինծառայողներն այսուհետ կարող են իրենց մոտ ունենալ բջջային հեռախոսներ։ Բայց, բնականաբար, կան դրանց տեսակի ու օգտագործման սահմանափակումներ, հեռախոսներից օգտվելու կանոնակարգ, որոնք ՀՀ ՊՆ մամուլի խոսնակ Արծրուն Հովհաննիսյանը ներկայացրել է ֆեյսբուքյան իր էջում։

«Զինծառայողին թույլատրվում է ունենալ բացառապես տեսագրման, ձայնագրման, լուսանկարման և ինտերնետ հնարավորություններ չունեցող բջջային հեռախոս: Զորակոչված զինծառայողի բջջային հեռախոսը հաշվառվում է հանրապետական հավաքակայանում: Եթե զինծառայողի բջջային հեռախոսն ունի տեսագրման, ձայնագրման և ինտերնետ հնարավորություններ, ապա հեռախոսը հանրապետական հավաքակայանում վերադարձվում է զինծառայողի ներկայացուցչին` հանձման-ընդունման ստացականի հիման վրա:

Հանրապետական հավաքակայանում զինծառայողը ծանոթանում է բջջային հեռախոսակապով խոսակցությունների ժամանակ գաղտնիության ռեժիմի պահպանման պահանջներին: Զորամաս ներկայանալուց հետո զինծառայողը նախապատրաստական ստորաբաժանումում բջջային հեռախոսը ներկայացնում է հաշվառման: Զինծառայողին արգելվում է շարքում, պլանային և ոչ պլանային միջոցառումների, պարապմունքների, մարտական հերթապահության, վերակարգի, զենքի խնամքի ժամանակ օգտվել բջջային հեռախոսից: Զինծառայողը բջջային հեռախոսից կարող է օգտվել միայն զորամասի օրվա կարգացուցակով նախատեսված ազատ ժամերին»,–գրել է Հովհաննիսյանը:

Նա նաև տեղեկացնում է, որ զինծառայողի բջջային հեռախոսի հեռախոսավարձերի վճարումը կատարվում է զինծառայողի կամ նրա հարազատների կողմից:

ՀՀ ՊՆ մամուլի խոսնակը մեկ անգամ ևս հիշեցնում է հեռախոսից օգտվելու որոշ կարևոր անվտանգության կանոններ։

1. Բջջայինով խոսելիս խուսափեք զինվորական անցուդարձի մասին առնչվող խոսակցություններից:

2. Լարված իրադրության ժամանակ մի ՛ զանգահարեք ձեր մտերիմներին ու մի ՛ պատմեք ծավալվող իրադարձությունների մասին:

3. Մի կատարեք «վաղը մեզ մոտ տագնապ է լինելու» կամ նմանատիպ բովանդակությամբ այլ գրառումներ:

4. Մի հրապարակեք լուսանկարներ, որոնցում երևում են մարտական հենակետեր, դիրքեր, գաղտնի ապառազինություն կամ տեխնիկա, ավտոմեքենաների համարանիշներ և այլն:

5.Ռազմական գործողությունների ժամանակ անջատեք բջջային հեռախոսը:

Հիշեք հակառակորդը լսում է ձեզ և կարող է ձեր հեռախոսի դիրքով ոչնչացնել ձեզ ու ձեր ստորաբաժանումը:

Տեղեկությունը գրելիս Արծրուն Հովհաննիսյանը կիրառել է #Բջջայինհեռախոս #անվտանգություն #Չխոսել հեշթեգը։

280
թեգերը:
ՀՀ Պաշտպանության նախարարություն (ՊՆ), Արծրուն Հովհաննիսյան, Հայաստան
Ըստ թեմայի
Արթիկում կողաշրջվել է ՌԴ 102-րդ ռազմակայանի զինծառայողների ավտոմեքենան
Զինծառայողների խնդիրները երկրի ղեկավարության ամենօրյա ուշադրության կենտրոնում են. Տոնոյան
Փաշինյանն ընդունել է մահացած զինծառայողների ընտանիքների անդամներին
Ի՞նչ են ուտում զինվորները. զինծառայողների հարազատները կարող են համտեսել այդ ճաշատեսակները
ՊՆ ռազմական ոստիկանությունը բացահայտել է զինծառայողների իրականացրած շորթման դեպքը
Զինծառայողների իրավունքների խախտումների մասին խոսեց Հայաստանի օմբուդսմենը