ԵՐԵՎԱՆ, 5 օգոստոսի— Sputnik. Դեպի Գեղարդի վանք տանող ճանապարհը այսօր ևս փակ կլինի։ Այս մասին Sputnik Արմենիայի հետ զրույցում ասաց Տրանսպորտի, կապի և տեղեկատվական տեխնոլոգիաների նախարարության «Տրանսպորտային ծրագրերի իրականացման կազմակերպություն» ՊՈԱԿ-ի գլխավոր տնօրենի պաշտոնակատար Վազգեն Պետրոսյանը։
«Մոտավորապես 100 խմ զանգված է իջել սարի վրայից, ճանապարհը մինչև այժմ փակ եմ։ Այս պահին «Նորտեխշին» ընկերության և ԱԻՆ–ի աշխատակիցներն իրականացնում են պայթեցման աշխատանքներ։ Հնարավոր է, վաղն էլ այն փակ մնա, քանի որ 2000 խմ հողային և լեռնային զանգված կա, որ կախված վիճակում է։ Դա էլ պիտի իջեցնենք, որ ճանապարհը մեկընդմիշտ դառնա անվտանգ»,–ասաց Պետրոսյանը։
Հիշեցնենք, որ երեկ` օգոստոսի 4–ին, քարաթափում է տեղի ունեցել Գողթ գյուղի վերջնամասում, որ պատճառով Գեղարդի վանք տանող հատվածը փակ է:
