ԵՐԵՎԱՆ, 25 հուլիսի — Sputnik. Սերժ Սարգսյանի եղբորորդու՝ Նարեկ Սարգսյանի դեմ մարդ առևանգելու և բռնության ենթարկելու քրեական գործով նոր մանրամասներ են ի հայտ գալիս: Այս մասին գրում է «Ժողովուրդ» օրաթերթը։
Պարբերականին հայտնի է դարձել, որ 49-ամյա Արամը, որին առևանգել ու բռնության են ենթարկել, Նարեկ Սարգսյանի թիկնապահ Արտեմ Պետրոսյանի հետ համատեղ բիզնես է ունեցել:
Որոշ ժամանակ անց Արամը դիմել է Արտեմ Պետրոսյանին և հայտնել, որ չի ցանկանում համատեղ աշխատել, քանի որ կա այլ մարդ, որի հետ ուզում է ստեղծել նոր բիզնես:
Այդ մասին տեղեկացել է Նարեկ Սարգսյանը և Արամին հրավիրել հանդիպման: Ըստ լուրերի՝ թեև Արտեմ Պետրոսյանը Արամին զգուշացրել է, որ Նարեկի հետ հանդիպման չգնա՝ ասելով, որ իրեն լավ բան չի սպասվում, բայց Արամը գնացել է:
Դրանից հետո էլ տեղի է ունեցել միջադեպը. Արամին առևանգել են, սկզբում խոշտանգել Նարեկ Սարգսյանի տան նկուղում, հետո՝ «Սկանյա» բեռնատարների սպասարկման վարչական շենքում:
Թերթը հիշեցնում է՝ Արտեմ Պետրոսյանը հիմա կալանավորված է, իսկ Նարեկ Սարգսյանին հայտարարվել է հետախուզում: