ԵՐԵՎԱՆ, 20 հուլիսի — Sputnik. Երևանի կենդանաբանական այգու ամուրյան վագրերից արուն՝ Նոբելը, հանկարծամահ է եղել: Կենդանու անկումը գրանցվել է այսօր՝ հուլիսի 20-ին, կեսօրին մոտ: Նրան խնամողը նկատել է ազատավանդակի տարածքում՝ անշարժ պառկած:
Դին տեղափոխվել է Կենդանաբանական այգու կլինիկա, դիահերձման ժամանակ նմուշառում է արվել օրգաններից (լյարդ, փայծախ, երիկամ և թոք), որոնք, ըստ սահմանված կարգի, ուղարկվել են Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն՝ փորձաքննության:
Անկման նախնական պատճառը, ըստ այգու կենդանաբույժի, ծերությունն է:
Նոբելը ծնվել էր Կալինինգրադի կենդանաբանական այգում 2001 թվականի օգոստոսի 25-ին:
Մեկ ամսից պիտի լրանար զառամյալ արուի 17 տարին: Վայրի բնության մեջ վագրերն ապրում են միջինում 15 տարի, իսկ անազատության մեջ, բացառիկ դեպքերում, մինչև 25:
Նոբելը Երևանի կենդանաբանական այգի էր եկել 2005 թ.ի մայիսի 9-ին:
Կենդանաբանական այգում մնաց երեք վագր։
