Տարոն Մարգարյան

ԱԱԾ–ն պատրաստվում է հարցաքննել Տարոն Մարգարյանին

349
(Թարմացված է 14:47 19.07.2018)
Ազգային անվտանգության ծառայությունում նյութեր են նախապատրաստվում Երևանի նախկին քաղաքապետի վերաբերյալ։ Նրան շուտով կհրավիրեն հարցաքննության։

ԵՐԵՎԱՆ, 19 հուլիսի — Sputnik. Երևանի նախկին քաղաքապետ Տարոն Մարգարյանն ԱԱԾ դեռ չի հրավիրվել, բայց կհրավիրվի։ Այս մասին այսօր լրագրողներին ասաց Ազգային անվտանգության ծառայության տնօրեն Արթուր Վանեցյանը։

«Տարոն Մարգարյանի անունով գրանցված անձնական բիզնեսներ մենք չենք հայտնաբերել։ Ունեցվածքը, որի մասին նաև հրապարակում է եղել, կոռուպցիայի հակազդման գծով վարչապետի օգնականը նյութերը փոխանցել է մեզ։ Այդ նյութերով իրականացվում են ուսումնասիրություններ։ Կլինեն կոնկրետ միջոցառումներ»,- ասաց նա։

Հարցին՝ հնարավո՞ր է` Տարոն Մարգարյանին կանչեն ԱԱԾ, ու պարզվի, որ նա երկիրը լքել է, Վանեցյանը կարճ պատասխանեց` ոչ:

Մարգարյանն ԱԱԾ կհրավիրվի «Երևան» հիմնադրամի գործով։ Վանեցյանը նաև ավելացրեց, որ հիմնադրամում ստուգումները մոտենում են ավարտական փուլին։

«Թավշյա հեղափոխությունից» հետո մի շարք ակտիվիստներ մի քանի օր շարունակ քաղաքում բողոքի ակցիաներ էին իրականացնում` պահանջելով Երևանի քաղաքապետ Տարոն Մարգարյանի հրաժարականը։ Նա հրաժարական ներկայացրեց հուլիսի 9-ին։

Ավելի վաղ համացանցում տեսանյութ հրապարակվեց, որտեղ մանրամասն ներկայացվում էր Տարոն Մարգարյանին ու նրա ընտանիքին պատկանող ունեցվածքը, այդ թվում` բիզնեսները։

Հիշեցնենք, որ «Երևան» հիմնադրամի տնօրեն Աշոտ Ղազարյանն ու Դավթաշեն վարչական շրջանի ղեկավարի տեղակալ Խաչատուր Կիրակոսյանը ձերբակալվել են:
Հունիսի 13-ին հայտնի է դարձել, որ ՀՀ քաղաքացիներ Վ.Գ.-ից և Ա.Խ.-ից այն մասին, որ Երևանի քաղաքապետարանի պաշտոնատար անձինք, կառուցապատման և գույքի ձևակերպման համապատասխան թույլտվություններ տրամադրելու դիմաց, բացի օրենքով սահմանված վճարումներից, իրենց պարտադրել են «Երևան» հիմնադրամին փոխանցել խոշոր չափերով գումարներ:

Նյութերի նախապատրաստման ընթացքում պարզվել է, որ վերոնշյալ պատրվակով առձեռն ստացված գումարների մի մասը հիմնադրամի հաշվեհամար չի մուտքագրվել և հափշտակվել է:

Հանցագործության մասին հաղորդումների հիման վրա ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 308-րդ հոդվածի 2-րդ մասի («Պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ») և 178-րդ հոդվածի 2-րդ մասի 1.1 կետի («Պաշտոնական դիրքն օգտագործելով կատարված խարդախություն») հատկանիշներով:

Երևանի քաղաքապետարանի վարչական շենքում տեղակայված «Երևան» հիմնադրամի աշխատասենյակներում քրեական գործով կատարվել են խուզարկություններ: Իրականացվում են լայնածավալ օպերատիվ-հետախուզական միջոցառումներ և քննչական գործողություններ` քաղաքացիներից գումարների հավաքագրման հանգամանքները, ծախսերի ուղղությունները և նպատակայնությունը, ինչպես նաև օրինականությունը պարզելու ուղղությամբ:

349
թեգերը:
Տարոն Մարգարյան, Հայաստան
Ըստ թեմայի
Ո՞վ կնստի Տարոն Մարգարյանի աթոռին. կանայք ակտիվացել են
Ինչո՞ւ է Տարոն Մարգարյանը հրաժարական տվել. բացատրում է ՀՀԿ–ական փաստաբանը
Գալուստ Սահակյանը խոսել է Տարոն Մարգարյանի ունեցվածքից
Տարոն Մարգարյանի 50 երանգները․ ինչ է թողել իր հետևից Երևանի քաղաքապետը