ԵՐԵՎԱՆ, 18 հուլիսի — Sputnik. 2016-2017թթ. ընթացքում որոշ վարորդներ ու տաքսի ծառայություններ` ՃԵԿ խախտումների դիմաց տուգանքներ չվճարելու համար ավտոմեքենաները գրանցել են գույք կամ եկամուտ չունեցող անձանց անուններով։ Իսկ ԴԱՀԿ-ում վարչական այս վարույթներն այդ հիմքով դադարեցրել են։
ՀՀ գլխավոր դատախազության հրապարակած տվյալներով` խոսքը 478 անձանց նկատմամբ հարուցված վարույթների մասին է, որոնցով պետությանը հասցված վնասը հաշվարկվել է 1 մլրդ 380 մլն դրամ:
Բացահայտված փաստերով հարուցվել է 7 քրեական գործ:
Նշենք, որ այս սխեմայի մասին առաջին բացահայտումն արել էր ՀՀ վերահսկիչ պալատն իր տարեկան հաշվետվության մեջ։
Դատախազությունը նախկինում այս հիմքերով 5 քրեական գործ էր հարուցել, որոնցով վնասի չափը գնահատվել էր 606 մլն դրամ:
Նշենք, որ հուլիսի 12-ին ՀՀ ԱԺ-ը հաստատեց կառավարության առաջարկած համաներումը մինչեւ 2017 թվականի դեկտեմբերի 31-ը կատարած ու չվճարված խախտումների ու դրանց դիմաց կուտակված տույժ-տուգանքների նկատմամբ։
Համաներումը տարածվում է 150 000 վարորդների վրա, ովքեր ինչ-ինչ պատճառով չեն կարողացել վճարել տուգանքը։ Կառավարությունը վստահ է, որ պատճառը անվճարունակությունն է։
Նախագիծը ներկայացնելու ժամանակ ՀՀ արդարադատության նախարար Արտակ Զեյնալյանը հայտարարել էր, որ զիջվող գումարի չափը 13,7 մլրդ դրամ է։
