ԵՐԵՎԱՆ, 14 հուլիսի — Sputnik. «Փաստ» օրաթերթի խմբագրություն դիմած քաղաքացիները դժգոհում են, որ ՀՀ ԱԺ պատգամավոր Սամվել Ալեքսանյանին պատկանող «Աստղիկ» բժշկական կենտրոնում բարձրացել են ծառայությունների գները: Այն էլ՝ մոտ 20 տոկոսով:
«Էս էլ հեղափոխության օգուտը: Սրանց բերեցին օրինական դաշտ, հիմա էդ քսան տոկոսներն էլ մեր ջանից են հանում»,-կեսլուրջ-կեսկատակ ասել է նրանցից մեկը։
Թերթը գրում է, որ բուժհաստատությունները ԱԱՀ-ով չեն հարկվում, ինչի մասին են վկայում նաև նշյալ կենտրոնի կողմից տրված կտրոնները, ուր ԱԱՀ տողում գրված է 0: Այսինքն, թանկացումների պատճառները շատ ավելի խորքային են:
«Վերադառնալով գներին, նշենք, որ, ի մասնավորի, վերակենդանացման բաժանմունքում մեկ օր մնալու համար նախկին 40.000 դրամի փոխարեն հիմա վճարում են 50.000 դրամ, նույն համամասնությամբ թանկացել են նաև որոշ հետազոտությունների, ինչպես նաև բուժման գները»,- նշված է հոդվածում:
Թերթը մի ուշագրավ հանգամանք էլ նշել. այստեղ ոչ վիրահատական բուժման վճարը ոչ թե հաստատագրված է, այլ օրական կտրվածքով, ասենք՝ օրը 25.000 դրամ՝ նախկին 20.000-ի փոխարեն՝ ընդհանուր պալատում: Քանի օր կմնա հիվանդը, այնքան էլ կվճարի:
Թե ինչու են բարձրացել գները, պարբերականը փորձել է պատասխան ստանալ «Աստղիկ» բժշկական կենտրոնից:
Թերթը նշում է` մի կերպ գտան մեկին, ով կարող է պատասխանել, նա էլ խնդրեց գրավոր ուղարկել հարցը, ուղարկեցինք: Անցել է մի քանի օր, իսկ պատասխան չկա:
«Փաստը» եզրափակում է ` երևի դժվար է պատասխանել՝ իրոք գները բարձրացել են, թե ոչ: Կամ էլ ավելի դժվար է պատասխանել երկրորդ հարցին՝ ինչո՞ւ են բարձրացել:
