ԵՐԵՎԱՆ, 21 հունիսի — Sputnik. Հայաստանի խորհրդարանում սպանություններից հետո պաշտպանության փոխնախարար Մանվել Գրիգորյանը ցանկացել է պատժել Ռոբերտ Քոչարյանին, Sputnik Արմենիա մամուլի կենտրոնում ասաց ՀՀ Ազգային անվտանգության ծառայության սահմանապահ զորքերի նախկին հրամանատար, գեներալ–մայոր Լևոն Ստեփանյանը։
Խորհրդարանում տեղի ունեցած ահաբեկչությանը հաջորդած օրերին այդ օրերի պաշտպանության նախարար Վաղարշակ Հարությունյանը և բանակի մնացած ղեկավարությունը չի ենթարկվել Քոչարյանին։
Ստեփանյանի խոսքով` զինվորականները մտածել են` ինչպես պատժեն Քոչարյանին ԱԺ–ում տեղի ունեցած սպանությունների համար, քանի որ բոլորը կասկածել են նրան։ Դեպի Երևան զորքեր են շարժվել, օրինակ` Վանաձորից։
«Ծրագիր կար պատժել բոլոր նրանց, ում կասկածել են այդ սպանությունների մեջ», – ասաց Ստեփանյանը։
Բայց այդ ժամանակվա պաշտպանության նախարար Վաղարշակ Հարությունյանն առանցքային կերպար չէր այդ գործընթացում, նա նշանակվել էր դրանից մի քանի ամիս առաջ։
«Այդ գործողություններին մասնակցել են Մանվել Գրիգորյանը և Սեյրան Սարոյանը։ Հարությունյանին ավելի ուշ զրկել են պաշտոնից, ապա աստիճանազրկել, իսկ Մանվել Գրիգորյանն ու Սեյրան Սարոյանը ստացել են հերթական կոչումները և պաշտոնները», – ասաց Ստեփանյանը։
Նա պնդում է, որ ամբողջ ռազմական ղեկավարությունը հավաքվել էր Մանվել Գրիգորյանի շուրջը (այդ ժամանակ` պաշտպանության փոխնախարարի)։ Նա փողոց է հանել նաև «Երկրապահ» կամավորների միությանը։
«Ես չեմ կարող միանշանակ ասել, որ նա ղեկավարել է բանակի գործողությունները, բայց բոլորը հավաքվել էին նրա շուրջը», – ասաց Ստեփանյանը։
Զինվորական ղեկավարությունն ունեցել է նոր կառավարության ցուցակը։ Վարչապետ պետք է դառնար Վահան Շիրխանյանը։ Այդ ցուցակով նրանք նույնիսկ գնացել են Քոչարյանի մոտ` վերջնագիր ներկայացնելով։
Բայց հետո իրավիճակը փոխվել է, կողմերը պայմանավորվել են։ Սպանված վարչապետ Վազգեն Սարգսյանին այդ պաշտոնում փոխարինել է Արամ Սարգսյանը։
Իսկ պաշտպանության նախկին նախարար Վաղարշակ Հարությունյանը հենց այնպես զրկվել է իր կոչումից։ Դա արել է Քոչարյանը, բայց նախագահը նման իրավունք չուներ, դա պետք է որոշվեր դատարանում։
Խմբագրությունը փորձում է ստանալ Վաղարշակ Հարությունյանի մեկնաբանությունը, որն ավելի ուշ կներկայացնենք ընթերցողներին։
1999թ–ի հոկտեմբերի 27–ին ոճրագործների խումբը` Նաիրի Հունանյանի գլխավորությամբ, ներխուժեց Հայաստանի Ազգային ժողովի նիստերի դահլիճ և սպանեց ԱԺ խոսնակ Կարեն Դեմիրճյանին, վարչապետ Վազգեն Սարգսյանին, փոխխոսնակներ Յուրի Բախշյանին և Ռուբեն Միրոյանին, օպերատիվ հարցերով նախարար Լեոնարդ Պետրոսյանին, պատգամավոր Արմենակ Արմենակյանին, Հենրիխ Աբրահամյանին և Միքայել Քոթանյանին:
