Փաշինյանն ու Պուտինը

Ինչի՞ մասին են խոսելու Պուտինն ու Փաշինյանը. գազի հարցը կլինի՞ ֆուտբոլային օրակարգում

162
Ֆուտբոլի աշխարհի առաջնության շրջանակներում Մոսկվա կատարելիք այցի օրակարգում Փաշինյան–Պուտին հանդիպման օրակարգում գազի սակագնին վերաբերող հարցը ներառված չէ։

ԵՐԵՎԱՆ, 11 հունիսի — Sputnik. Մոսկվայում Ֆուտբոլի աշխարհի առաջնության բացմանը ՀՀ վարչապետ Նիկոլ Փաշինյանի ու ՌԴ նախագահ Վլադիմիր Պուտինի հանդիպման օրակարգում այս պահին գազի գնի շուրջ բանակցություններ նախատեսված չեն։ Այս մասին այսօր կառավարության նիստից առաջ լրագրողների հետ զրույցում հայտնեց ՀՀ էներգետիկայի և բնական պաշարների նախարար Արթուր Գրիգորյանը։

«Ռուսական կողմի հետ գազի գնի շուրջ բանակցությունները կսկսվեն տարվա վերջին` նոյեմբեր ամսին, քանի որ տարեվերջին պայմանագիրն ավարտվելու է»,- ասաց նախարարը։

ՀՀ կառավարությունը Իրանի հետ գազի մատակարարման շուրջ բանակցություններ առայժմ չի վարում։ Իրանական կողմի հետ քննարկումը նախատեսված է հունիսի վերջին։

«Այս ամսվա վերջ կունենանք իրանական կողմի հետ բանակցություններ և կունենանք նախնական պատկերացումներ»,- ասաց նախարարը։

Նա ավելացրեց, որ ՀՀ-ն երբեք չի դադարելու բանակցել գազի և էլեկտրաէներգիայի գնի նվազեցման ուղղությամբ և ցանկացած հնարավորություն օգտագործելու է այդ նպատակով։

Ավելի վաղ հայտնի էր դարձել, որ Ֆուտբոլի աշխարհի առաջնության բացման արարողությանը կմասնակցի նաև ՀՀ վարչապետ Նիկոլ Փաշինյանը։ Դա կլինի վարչապետի կարգավիճակում նրա առաջին այցը Մոսկվա։ Բացման արարողությանը ներկա է լինելու նաև Ադրբեջանի նախագահ Իլհամ Ալիևը։

Հիշեցնենք` հունիսի 8-ին կառավարության նիստում անապահով խավերի համար էլեկտրաէներգիայի սակագնի նվազեցման ծրագրի ներկայացումից հետո ՀՀ էներգետիկ ենթակառուցվածքների և բնական պաշարների նախարար Արթուր Գրիգորյանը հայտարարել էր, որ չի բացառում նաև գազի գնի նվազեցման հնարավորությունը։

Նա նշել էր, որ գազի գնի շուրջ միջպետական պայմանագրի ժամկետը լրանում է տարեվերջին ու չէր բացառել, որ նոր պայմանագիրը կկնքվի նոր գնով։

Ինչ վերաբերում է գազի` սպառողների համար սահմանված սակագնին, դրա բարձր լինելու մասին Ռուսաստանի նախագահի հետ հանդիպմանն ակնարկել էր ՀՀ վարչապետ Նիկոլ Փաշինյանը, ում ղեկավարած կառավարությունն իր գործունեության առաջնահերթությունների թվում նշել է նաև սակագների վերանայման հարցը։

162
թեգերը:
Վլադիմիր Պուտին, Նիկոլ Փաշինյան, Ռուսաստան, Հայաստան
Ըստ թեմայի
Գազի սակագինը կարող է նվազել 70 դոլարով. փորձագետը հաշվել ու սպասում է գործնական քայլերի
Հայաստանը չի բացառում, որ ռուսական գազը կփոխարինի իրանականով
ՌԴ իշխանությունները գիտեն` ինչու է Երևանը ուզում ուսումնասիրել գազի սակագները. վարչապետ
Հայաստանի բնակչության համար գազի օպտիմալ սակագինը 220 դոլար է. փորձագետ
Հայաստանում իրանական գազը չի կարող մրցել ռուսականի հետ. փորձագետ