Տիգրան Բալայան

Սա Բաքվի հերթական սադրանքն է. ՀՀ ԱԳՆ-ն մեկնաբանել է հայ զինծառայողին սպանելու փաստը

184
(Թարմացված է 12:19 11.06.2018)
ՀՀ ԱԳՆ հիշեցնում է, որ արցախա–ադրբեջանական շփման գծում հունիսի 10–ի սադրանքի հնարավոր բոլոր հետևանքների պատասխանատվությունն ամբողջությամբ կրում է ադրբեջանական կողմը։

ԵՐԵՎԱՆ, 11 հունիսի — Sputnik. ԵԱՀԿ Մինսկի խմբի համանախագահների Հայաստան այցելության նախօրեին կատարված այդ քայլը գնահատում ենք որպես Բաքվի հերթական սադրանք։ ՀՀ ԱԳՆ մամուլի խոսնակ Տիգրան Բալայանի մեկնաբանությունն է նախօրեին հակառակորդի կրակոցից հայկական կողմի ունեցած զոհի վերաբերյալ։

Հիշեցնենք, որ հունիսի 10–ին Արցախում ՊԲ զորամասերից մեկի պահպանության դիրքում հակառակորդի կրակոցից մահացու վիրավորում էր ստացել պայմանագրային զինծառայող Վահագն Ջոնիկի Եղոյանը։

«ԵԱՀԿ Մինսկի խմբի համանախագահների Հայաստան այցելության նախօրեին կատարված այդ քայլը գնահատում ենք որպես Բաքվի հերթական սադրանք՝ ուղղված տարածաշրջանում իրավիճակի սրմանը և լարվածության նվազեցման շուրջ պայմանավորվածությունների տապալմանը։ Տվյալ միջադեպը ևս մեկ անգամ ընդգծում է 1994-1995թթ․ զինադադարի հաստատման և ամրապնդման մասին եռակողմ անժամկետ համաձայնագրի կատարման, ինչպես նաև ղարաբաղյան կարգավորման շուրջ 2016-2017թթ․ գագաթաժողովների ժամանակ շփման գծում միջադեպերի հետաքննության մեխանիզմի ներդրման, ԵԱՀԿ նախագահողի անձնական ներկայացուցչի թիմի կարողությունների ընդլայնման վերաբերյալ ձեռք բերված պայմանավորվածությունների կյանքի կոչման կարևորությունը։

Մենք բազմիցս հայտարարել ենք, որ ղարաբաղյան հիմնախնդրի կարգավորման գործընթացում առաջընթացի բանալին խաղաղ բանակցություններին նպաստող մթնոլորտի ձևավորումն է։ Ադրբեջանական կողմի նմանօրինակ գործողությունները, ըստ էության, հակադիր նպատակ են հետապնդում։

Սույն սադրանքի հնարավոր բոլոր հետևանքների պատասխանատվությունն ամբողջությամբ կրում է ադրբեջանական կողմը»,–նշված է հաղորդագրության մեջ։

184
թեգերը:
ԵԱՀԿ Մինսկի Խումբ, Արցախ, Հայաստան
Ըստ թեմայի
Արցախում հակառակորդի կրակոցից վիրավորված զինծառայողը տեղափոխվել է Երևան
Արցախում միշտ հայեր են ապրել. Սոլովյով
Արցախում հակառակորդի կրակոցից 20–ամյա զինծառայող է վիրավորվել