Տարոն Մարգարյան

Տարոն Մարգարյանի դեմ քրեական գործ չի հարուցվել. քաղաքապետարանը հերքում է

302
(Թարմացված է 19:11 09.06.2018)
Քաղաքապետարանը հորդորում է զերծ մնալ անհարկի շահարկումներից։

ԵՐԵՎԱՆ, 9 հունիսի — Sputnik. Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը ֆեյսբուքյան իր էջում անդրադարձել է «Յունիգրաֆ-Իքս» ընկերության դեմ հարուցված քրեական գործին:

«Այսօր որոշ լրատվամիջոցների կողմից տարածվել է քաղաքացիական ակտիվիստ Զարուհի Հովհաննիսյանի ֆեյսբուքյան գրառումն այն մասին, որ ՀՀ ոստիկանության ԿՀԴՊ ԳՎ կոռուպցիայի և տնտեսական գործունեության դեմ ուղղված հանցագործությունների հակազդման վարչությունում նախապատրաստված նյութերով հարուցվել է քրեական գործ շների ստերջացմամբ զբաղվող «Յունիգրաֆ-Իքս» ընկերության գործունեության դեմ եղած բողոքները հաշվի առնելով: Քանի որ Երևանի քաղաքապետարանը տվյալ ընկերության հետ ունի որոշակի պայմանագրային հարաբերություններ, ակտիվիստը մեկնաբանել է դա իբրև Երևանի քաղաքապետի դեմ քրեական գործի հարուցում, ինչը բացարձակ ապատեղեկատվություն է»,- գրել է Գևորգյանը:

Նա մեկ անգամ ևս շեշտել է, որ թափառող կենդանիների վնասազերծման ծառայությունների ձեռք բերումը իրականացվել է գնումների օրենսդրությամբ սահմանված կարգով-մրցույթով՝ բաց ընթացակարգով: Ծառայությունների համար կնքված պայմանագիրն էլ հրապարակվել է Երևանի քաղաքապետարանի պաշտոնական կայքում։

«Վերոնշյալը հաշվի առնելով հորդորում եմ զերծ մնալ անհարկի շահարկումներից և ավելորդ հուզականությամբ չմիջամտել իրավապահ մարմինների կողմից իրականացվող գործընթացին»,- եզրափակել է Գևորգյանը:

Ոստիկանությունն ավելի վաղ հայտնել էր, որ «Յունիգրաֆ-Իքս» ընկերությունում 185 մլն դրամի յուրացման դեպք է բացահայտել։ Պարզվել է, որ 2016-2018 թվականների ընթացքում վերոհիշյալ ընկերությունը Երևանի քաղաքապետարանից ստացել է շուրջ 267 միլիոն դրամ: Այս ժամանակահատվածում ընկերությունը ձևակերպել է, թե ձեռք է բերել 128 տոննա հավի միս, մինչդեռ նախապատրաստված նյութերով պարզվել է, որ փաստացի օգտագործվել է 12,6 տոննա: Ձևակերպվել է 206 տոննա բրնձի ձեռք բերում, պարզվել է, որ փաստացի օգտագործվել է 8,4 տոննա: Իսկ ձևակերպված 25 տոննա խոզի միս ընդհանրապես չի օգտագործվել: Արդյունքում յուրացվել է շուրջ 185 միլիոն դրամ: Պարզվել է նաև, որ «Յունիգրաֆ-Իքս» ՍՊ ընկերության գործունեության վերահսկողությունը ստանձնել էր Երևանի քաղաքապետարանի աշխատակազմի առևտրի և սպասարկումների վարչությունը։
302
թեգերը:
Տարոն Մարգարյան, Հայաստան