ԿԲ բանկի նախկին նախագահը հորդորում է չհետաձգել կուտակային կենսաթոշակային համակարգը
(Թարմացված է 15:19 30.05.2018)
Հայաստանի կառավարությունը պետք է հնարավորինս արագ ներմուծի կուտակային կենսաթոշակային համակարգի պարտադիր բաղադրիչը մասնավոր հատվածի աշխատողների համար։ԵՐԵՎԱՆ, 30 մայիսի — Sputnik. Հայաստանի Կենտրոնական բանկի նախկին նախագահ Բագրատ Ասատրյանը սխալ է համարում մասնավոր հատվածի աշխատողների համար պարտադիր կուտակային կենսաթոշակային համակարգի ներմուծումը հետաձգելու դիրքորոշումը։
©
Sputnik / Asatur Yesayants
Ասատրյանի խոսքով` նախկին իշխանություններն առանց այդ էլ բազմիցս հետաձգել են պարտադիր բաղադրիչի ներմուծումը, հետևաբար այսօրվա կառավարությունը պետք է հնարավորինս արագ ներառի այն։ Ասատրյանը մի քանի պատճառներ է բերում, որոնք, նրա կարծիքով, թելադրում են կուտակային համակարգի պարտադիր բաղադրիչները կիրառելու անհրաժեշտությունը։
Առաջին հերթին, խոսքն այն մասին է, որ կենսաթոշակների չափը գոնե նվազագույն սպառողական զամբյուղին հասցվի։ Ներկա պահին Հայաստանում կենսաթոշակների միջին չափը մոտ 40 հազար դրամ է, իսկ նվազագույն սպառողական զամբյուղը կազմում է 55 հազար դրամ։
Պարտադիր կուտակային համակարգին անցում կատարելը լրացուցիչ հնարավորություններ կտա երկրի տնտեսությունում ստվերային շրջանառությունը կրճատելու համար։ Եվս մեկ կարևոր խնդիր, որը կլուծի պարտադիր բաղադրիչի ներմուծումը, Հայաստանի ներդրումային գրավչության բարձրացումն է, վստահ է Ասատրյանը։
«Պարտադիր կուտակային վճարներից ստացված ընդհանուր միջոցների ծավալն արդեն գործող համակարգի շրջանակում հիմա հասել է մոտ 110 միլիարդ դրամի։ Դրանք մեծ փողեր են, և, ամենագլխավորը, էժան և երկար փողեր, որոնք ժամանակի ընթացքում կարող են ավելանալ և թույլ կտան խթանել տնտեսության առանցքային ոլորտները», — նշեց ԿԲ նախկին ղեկավարը։
©
Sputnik / Asatur Yesayants
Նրա կարծիքով` հերթական, չորրորդ հետաձգումը կարող է խաթարել կառավարող հիմնադրամների վստահությունը Հայաստանի և նոր կառավարության նկատմամբ։ Խոսքը վերաբերում է երկու հիմնադրամներին, որոնք գործում են կենսաթոշակային համակարգի շրջանակում` «Ամունդի-ԱԿԲԱ Ասեթ Մենեջմենթ» ՓԲԸ (2013թ-ի նոյեմբերի 19-ից) և «Ցե-Կվադրատ Ամպեգա Ասեթ Մենեջմենք Արմենիա» ՍՊԸ (2013թ-ի նոյեմբերի 29-ից)։ «Ամունդի-ԱԿԲԱ Ասեթ Մենեջմենթ» ՓԲԸ-ի բաժնետերերն են ֆրանսիական ընկերությունը (51 տոկոս) և ACBA-Credit Agricole Bank-ը (49 տոկոս)։ «Ցե-Կվադրատ Ամպեգա Ասեթ Մենեջմենք Արմենիա» ՍՊԸ-ի բաժնետերերն են ավստրիական C-QUADRAT Investment AG ներդրումային ընկերությունը` 74,9 տոկոս և Talanx Asset Management GmbH գերմանական ընկերությունը` 25,1 տոկոս։
Հայաստանի աշխատանքի և սոցիալական հարցերի նախարար Մանե Թանդիլյանն օրերս կառավարության քննարկմանն է հանձնել որոշման նախագիծը, որի համաձայն` կուտակային կենսաթոշակային համակարգի պարտադիր բաղադրիչի ներմուծումը կհետաձգվի ևս մեկ տարով` մինչև 2019թ-ի հուլիսի 1-ը։
Հիշեցնենք, որ 2014թ-ի հուլիսի 1-ից կուտակային կենսաթոշակային վճարները պարտադիր կարգով սկսել են գանձել պետական ծառայողներից, իսկ 2018թ-ի հուլիսի 1-ից դրանք պետք է գանձվեին թե՛ պետական, թե՛ մասնավոր հատվածներից։
Հայաստանն այս տարի չի մասնակցի «Եվրատեսիլին»
(Թարմացված է 14:40 05.03.2021)
Հանրային հեռուստաընկերությունը հայտարարություն է տարածել` հայտնելով, թե որն է նման որոշում կայացնելու պատճառը։ ԵՐԵՎԱՆ, 5 մարտի – Sputnik. Համապարփակ քննարկումներից և բանակցություններից հետո Հանրային հեռուստաընկերությունը հայտարարում է, որ Հայաստանն այս տարի չի մասնակցի «Եվրատեսիլ» երգի միջազգային մրցույթին:
«Տեղի ունեցած իրադարձությունները, ժամանակի սղությունը և այլ օբյեկտիվ հանգամանքներ անհամադրելի են երգի մրցույթում Հայաստանի պատշաճ ներկայացման հետ»,– նշված է հեռուստաընկերության տարածած հաղորդագրության մեջ, որը հրապարակվել է Facebook–ում:
Հիշեցնենք` «Եվրատեսիլ 2020» երգի մրցույթը չեղարկվեց կորոնավիրուսի համավարակի պատճառով։ Մրցույթը նախատեսված էր Ռոտերդամում մայիսի 12-ին, 14-ին և 16-ին: Եվրոպայի հեռարձակողների միությունը որոշեց չեղարկել այն կորոնավիրուսի համավարակի պատճառով: Հայաստանը պետք է ներկայացներ Աթենա Մանուկյանը։
«Եվրատեսիլ 2021» երգի միջազգային մրցույթն այս տարի կանցկացվի նոր ձևաչափով։ Ռոտերդամում անցկացվելիք մրցույթի նոր կանոնները կապված են կորոնավիրուսային իրավիճակի և վարակի տարածման կանխարգելման հետ։ «Եվրատեսիլի» մասնակից երկրների պատվիրակություններին խորհուրդ կտրվի Նիդեռլանդներ մեկնելուց առաջ հինգ օրով ինքնամեկուսանալ։ Իսկ թռիչքից 72 ժամ առաջ կորոնավիրուսն ախտորոշող թեստ հանձնելը և դրա բացասական արդյունքի առկայությունը պարտադիր է։
Հայաստանի հավաքականի նախկին ֆուտբոլիստը Հարավային Ամերիկայում ՀՖՖ դեսպան է նշանակվել
(Թարմացված է 14:39 05.03.2021)
Ֆուտբոլիսն ասել է, որ շատ երջանիկ է կրկին հայկական ֆուտբոլում ներգրավված լինելու հնարավորության համար։ ԵՐԵՎԱՆ, 5 մարտի – Sputnik. Հայաստանի ազգային հավաքականի նախկին կիսապաշտպան Մարկոս Պիզելին նշանակվել է Հարավային Ամերիկայում ՀՖՖ դեսպան: Տեղեկությունը հայտնում է Հայաստանի ֆուտբոլի ֆեդերացիայի մամուլի ծառայությունը։
ՀՖՖ պաշտոնական կայքի հետ զրույցում Մարկոս Պիզելին խոսել է իր զգացողությունների, ծրագրերի և նպատակների մասին։
«Շատ երջանիկ եմ կրկին հայկական ֆուտբոլում ներգրավված լինելու հնարավորության համար: Կանեմ առավելագույնը՝ Հայաստանին վերադարձնելու այն ամենը, ինչ այդ երկիրն է տվել ինձ: Իմ գործառույթներից մեկը կլինի տարբեր միջոցառումների ժամանակ Հայաստանը ներկայացնելը: Բացի այդ, ես պետք է ավելի սերտ հարաբերություններ հաստատեմ Հարավային Ամերիկայում հայկական սփյուռքի հետ: Հնարավոր է՝ կարողանամ նոր ֆուտբոլիստներ հայտնաբերել, որոնք ապագայում կհամալրեն Հայաստանի ազգային հավաքականը: Ես մեծ ցանկություն ունեմ սովորելու: Վստահ եմ՝ ՀՖՖ-ն կաջակցի ինձ այդ հարցում, իսկ ես կփորձեմ իմ ներդրումն ունենալ հայկական ֆուտբոլի զարգացման գործում»,– ասել է նա:
ՀՖՖ նախագահ Արմեն Մելիքբեկյանը ևս անդրադարձել է Մարկոս Պիզելիի նշանակմանը:
©
Sputnik / Asatur Yesayants
«Մոտ մեկ ամիս առաջ արդեն հայտարարել էինք Յուրա Մովսիսյանի՝ Հյուսիսային Ամերիկայում ՀՖՖ դեսպան նշանակվելու մասին: Այժմ որոշել ենք, որ նմանատիպ գործառույթներով Հարավային Ամերիկայում կզբաղվի մեր նշանավոր ֆուտբոլիստներից ևս մեկը՝ Մարկոս Պիզելին: Մենք շարունակում ենք հավատարիմ մնալ մեր որդեգրած քաղաքականությանը. մեզ համար շատ կարևոր է, որպեսզի Հայաստանի ազգային հավաքականում մեծ ներդրում ունեցած ֆուտբոլիստները շարունակեն ներգրավված մնալ հայկական ֆուտբոլում, իրենց փորձն ու գիտելիքները ծառայեցնեն հայկական ֆուտբոլի զարգացմանը: Հարավային Ամերիկան շատ կարևոր տարածաշրջան է մեզ համար: Այստեղ կան հայկական մեծաքանակ համայնքներ, որոնցում շատ են ֆուտբոլով զբաղվող երիտասարդները: Վստահ եմ, որ Մարկոս Պիզելին հենց այն անձնավորությունն է, որը կարող է գտնել հայազգի ֆուտբոլիստներ, որոնք կարող են համալրել Հայաստանի տարբեր տարիքային հավաքականները»,– ասել է Մելիքբեկյանը:
Հիշեցնենք` հունվարի 11-ին հայտնի դարձավ, որ Բրազիլիայում անհատական պարապմունքների ժամանակ ստացած վնասվածքի պատճառով ֆուտբոլիստը հավելյալ բուժզննում է անցել Հայաստանում, և պարզ է դարձել, որ նրան անհրաժեշտ է վիրահատություն, որից, սակայն, Պիզելին հրաժարվել է և որոշել է ավարտել իր կարիերան:
Հայաստանի ազգային հավաքականի կազմում Պիզելին անցկացրել է 66 խաղ ու դարձել 11 գոլի հեղինակ: Բրազիլացի ֆուտբոլիստը 35 տարեկան է։
Պատերազմից հետո մեր անվտանգային համակարգն ու բանակը ինքնահոսի են մատնվել. Վրթանեսյան
(Թարմացված է 15:30 05.03.2021)
Ռազմական փորձագետ, «Ռազմինֆո» կայքի համակարգող Կարեն Վրթանեսյանը Sputnik Արմենիայի եթերում անդրադարձել է թուրք–ադրբեջանական հերթական զորավարժություններին, ինչպես նաև հայկական բանակի վերականգնման խնդրին։ Վրթանեսյան. «Պատերազմից հետո մեր անվտանգային համակարգն ու բանակը թողնվեցին ինքնահոսի»
Կարեն Վրթանեսյանի դիտարկմամբ` իրականում Ադրբեջանը 44-օրյա պատերազմից հետո որևէ կերպ չի դադարեցրել ռազմաշունչ հռետորաբանությունը, շատ արագ համալրում է ռազմական կորուստները, գնում է նոր սպառազինություն, վերախմբավորում է զինված ուժերը։ Ըստ նրա` ակնհայտ է, որ Ադրբեջանը չի համարում պատերազմն ավարտված և պատրաստվում է հաջորդ լայնածավալ ռազմական գործողություններին։
«Ընդհանրապես մեր անվտանգության ամբողջ համակարգը կաթվածահար վիճակում է։ Այնպիսի տպավորություն է, որ ՊՆ–ի ու ԱԱԾ–ի լրատվական բաժիններն ավելի շատ Ադրբեջանի շահերն են պաշտպանում, քան Հայաստանի քաղաքացիների։ Մանավանդ բանակի և Նիկոլ Փաշինյանի միջև վերջին կոնֆլիկտը միանշանակորեն լավ չէ ընդհանուր անվտանգության համատեքստում։ Այն, ինչ կատարվում է պատերազմից հետո, պետք է ընթանար բոլորովին այլ ճանապարհով։ Նույնիսկ մի կողմ թողնելով այն հարցը, որ երկիրը պարտության տարած թիմը պետք է հրաժարական տար, մենք շատ արագ պետք է զբաղվեինք մեր բանակի վերազինմամբ, կորուստների վերականգնմամբ, նորությունների մշակմամբ»,– նշեց ռազմական փորձագետը։
Վրթանեսյանի կարծիքով` պատերազմից հետո մեր անվտանգային համակարգն ու բանակը թողնվեցին ինքնահոսի` դրանից բխող բոլոր ռիսկերով։
Անդրադառնալով ՀՀ երկրորդ նախագահ Ռոբերտ Քոչարյանի տեսակետին, որ բանակի վերականգնման համար անհրաժեշտ կլինի 3 միլիարդ դոլար, Վրթանեսյանն ընդգծեց, որ իրենց թիմի ու նախկին նախագահի հաշվարկները գրեթե նույնն են, և այդ գումարն անհրաժեշտ է մեր զինված ուժերը գոնե մինչպատերազմյան վիճակի բերելու համար։
«Բայց հաշվի առնենք, որ նաև շատ մեծ քանակով ռազմական ենթակառուցվածքներ են ոչնչացվել կամ հանձնվել թշնամուն` սկսած զորամասերից, վերջացրած դիրքերով։ Պետք է նորից իրականացվեն ամրաշինական աշխատանքներ, կառուցվեն ճանապարհներ, իսկ որոշ տեղերում ենթակառուցվածքները պետք է հիմնվեն զրոյից»,– նշեց ռաազմական փորձագետը։
Շուշիում ադրբեջանցի վանդալները պղծել են Հովհաննես Թևոսյանի կիսանդրին. տեսանյութ
Վրթանեսյանի խոսքով` վերջին պատերազմը ցույց տվեց, որ պետք է շատ արագ զարգացնել բանակը` այդ ուղղությամբ կատարելով անհրաժեշտ գնումներ, մասնավորապես՝ պետք է ձեռք բերել ԱԹՍ–ներ։ Ըստ նրա` մեզ պետք են ավելի մեծ գումարներ, որպեսզի փորձենք ոչ միայն բալանսի բերել բանակը, այլև որոշակի գերակայություն ապահովել։