ԵՐԵՎԱՆ, 24 մայիսի — Sputnik. Հայ մասնագետները գյուրզայի թույնի դեմ հակաթույն են ստեղծում։ Այն ավելի արդյունավետ կբուժի, քանի որ ուղղված կլինի հենց տեղական` կովկասյան գյուրզայի դեմ։
Երկար ժամանակ Հայաստանում այդ օձի եվրոպական ու միջինասիական տեսակների դեմ հակաթույն էին օգտագործում։ Օրինակ` խորհրդային տարիներին Ուզբեկստանում էին գյուրզայի դեմ շիճուկ արտադրում։ Այն ստեղծում էին միջինասիական գյուրզայի թույնի հիման վրա, իսկ օձերի ամեն ենթատեսակի թույնը տարբեր է։
Այսպես, հայ գիտնականների գնահատմամբ` միջինասիական ու կովկասյան գյուրզայի թույնի կազմը միայն մի քանի տոկոսով է համընկնում։
«Այդ պատճառով մենք ինքներս աշխատում ենք հենց կովկասյան գյուրզայի դեմ ուղղված նյութի վրա։ Դա նշանակում է, որ մեր պայմաններում այն շատ ավելի արդյունավետ կլինի։ Ու ոչ միայն մեր, այլև հարևան երկրների համար, որտեղ նույնպես կովկասյան գյուրզա կա», – Sputnik Արմենիայի հետ զրույցում ասաց ՀՀ ԳԱԱ Ֆիսիոլոգիայի ինստիտուտի տնօրեն Նաիրա Այվազյանը։
Օձի թույնի դեմ շիճուկը, որպես կանոն, ձիերի վրա են փորձում։ Նրանց նյութի փոքր չափաբաժին են ներարկում։ Ձիու օրգանիզմը սկսում է հակամարմիններ արտադրել։ Դրանց հիման վրա դեղորայք է ստեղծվում։
«Շիճուկի համար ակտիվ նյութն արդեն սինթեզել են։ Դեռ միայն փոքր կենդանիների վրա ենք փորձարկել, սակայն հետագայում ուզում ենք նաև ձիերի վրա փորձարկել։ Այդ ժամանակ արդեն կարելի է զանգվածային արտադրություն սկսել», – նշում է գիտնականը։
Նշենք` Հայաստանում գյուրզայի ակտիվության շրջանը ապրիլից նոյեմբեր ընկած ժամանակահատվածն է։ ԱԻՆ–ի հաղորդմամբ` ամեն տարի այդ օձի խայթոցից տասնյակ մարդիկ են տուժում։ Ռիսկի խմբում հիմնականում դաշտում աշխատող գյուղացիներն են։
