ԵՐԵՎԱՆ, 14 Ապրիլ — Sputnik. Հայաստան ժամանած եղնիկներին այցելության եկած բնապահպանության նախարարի պաշտոնակատար Արծվիկ Մինասյանն այսօր Դիլիջանում պատմեց, թե ինչ արկածներով են Իրանից Հայաստան հասել եզակի կենդանիները։ Հայաստան պիտի բերվեին 4 եղջերու, բայց մեկը փախել է։
«Բռնելուց հետո փախել է, չեն կարողացել բերել, բայց հետո նախատեսվում է ևս մեկը բերել»,- ասաց Մինասյանը։
Հայաստան տեղափոխված եղջերուներից մեկն էլ ստիպված է եղել զրկվել պոզերից, որպեսզի ճանապարհին իրեն ու ուղեկիցներին չվնասի։ Բայց Մինասյանը վստահեցրեց, որ կոտոշները շատ շուտով կաճեն, արու եղջերուն կվերագտնի իր ազնվացեղ տեսքը։
Իսկ նրա ուղեկից երկու էգերից մեկը Հայաստան է ժամանել հղի վիճակում։
«Մենք ակնկալում ենք, որ այս տարի կունենաք Հայաստանում ծնված «ՀՀ քաղաքացի» առաջին եղջերուն»,- ասաց Մինասյանը։
Եղջերուների ժամանակավոր կեցավայրը «Դիլիջան» ազգային պարկում բաղկացած է երկու մասից. առաջին 1հա տարածքի վրա բազմացման կենտրոնն է, որտեղ մարդու հետ շփումն ավելի մեծ է, էգ եղջերուներն այդտեղ պետք է սերունդներ տան հսկողության տակ։ Երկրորդ հատվածում` 9 հա տարածքում, պայմաններն ավելի մոտ են բնականին։ Այստեղ պետք է տեղափոխվեն 1 տարին բոլորած ձագերը, որոնք ավելի ուշ պետք է բաց թողնվեն վայրի բնություն։
«3-4 տարի բոլորած ձագերի վրա համապատասխան սարքավորում ամրացնելուց հետո նրանց բաց կթողնենք վայրի բնություն, որպեսզի հետևենք նաև նրանց շարժին ու ապահովենք նրանց անվտանգությունը»,- ասաց Արծվիկ Մինասյանը։
Մեկ ազնվացեղ եղջերուի արժեքը, նախարարի խոսքով, շուրջ 5000 եվրո է։ Բայց ո՛չ Հայաստանը, ո՛չ էլ դոնոր կազմակերպությունները Հայաստան տեղափոխված եղջերուների դիմաց չեն վճարել։ Հայաստանն ու WWF-ը Իրանին կենդանիների դիմաց սարքավորումներ են տրամադրել, իսկ վրացական կողմին արդեն բեզոարյան այծեր են փոխանցել ու առաջիկայում դրանց դիմաց եղջերուների նոր խմբաքանակ են սպասում։
Առաջիկա մեկ տարվա ընթացքում Վրաստանից ու Ռուսաստանից Հայաստան ևս 10-15 ազնվացեղ եղջերու է նախատեսվում բերել։
ՀՀ ազատ բնության մեջ այս պահին ազնվացեղ ոչ մի եղջերու չկա։ Վերջին եղջերուն բնության մեջ նկատվել է շուրջ 30 տարի առաջ` 1990-ականների սկզբում։ Անօրինական որսի հետևանքով հետագա տարիների ընթացքում Հայաստանի տարածքից բոլոր եղջերուները վերացել են։
