ԵՐԵՎԱՆ, 14 ապրիլի — Sputnik. Սերժ Սարգսյանի վարչապետ ընտրվելու դեմ բողոքի ակցիա իրականացնող ԱԺ «Ելք» խմբակցության ղեկավար Նիկոլ Փաշինյանի կողմնակիցները ներխուժել են Հանրային ռադիոյի շենք, մտել ռադիոստուդիաներից մեկն ու ուղիղ եթեր են պահանջում։
Նիկոլ Փաշինյանը բջջային հեռախոսով կապ հաստատեց Հանրային ռադիոյի տնօրեն Մարկ Գրիգորյանի հետ` տեղեկացնելով, որ այս պահին գտնվում է ստուդիաներից մեկում։
Նա նշեց, որ Հանրային հեռուստատեսությունն ու ռադիոն չեն լուսաբանում իրենց բողոքի միջոցառումները, այդ իսկ պատճառով խնդրում է ուղիղ եթեր տրամադրել, որպեսզի կարողանա դիմել Հայաստանի քաղաքացիներին։
Մարկ Գրիգորյանը խոստացավ մտածել և ավելի ուշ պատասխանել նրա խնդրանքին։
Նշենք, որ Փաշինյանը ներողություն խնդրեց Հանրային ռադիոյի աշխատակիցներից, որ անհարմարություն են պատճառում իրենց գործողությամբ։
