ԵՐԵՎԱՆ, 13 ապրիլի — Sputnik. Գառնի հեթանոսական տաճարի տարածքում հյուրանոց կառուցելն աղաղակող անարգանք կլինի սեփական ժողովրդի, մշակույթի ու ավանդույթների հանդեպ, այսօր լրագրողներին ասաց զբոսաշրջության մասնագետ, հեթանոս Վահե Լորենցը` մեկնաբանելով մամուլում շրջանառվող լուրերը։
ԶԼՄ-ների տվյալներով` Ռուսաստանում բնակվող հայ գործարարն ուզում է հյուրանոց կառուցել տաճարի շրջակայքում։ Ըստ լուրերի` նա բանակցում է իշխանության հետ։
«Մի քանի տարի առաջ հեթանոսական տաճարի տարածքում ուզում էին ռեստորան կառուցել։ Տարբեր պատճառաբանություններ էին բերում` սկսած տնտեսականից, վերջացրած զբոսաշրջային գործոններով։ Հիմա տեղեկություն է տարածվել, թե Գառնու կողքին ուզում են հյուրանոց կառուցել։ Սա պարզապես անկշտության դրսևորում է», — ասաց Լորենցը։
Նրա խոսքով` հիմնավորումները, թե կառուցումը խթանում է զբոսաշրջության զարգացումը, հեռու են իրականությունից։
Լորենցը նշեց, որ տաճարի շրջակայքում շինարարություն իրականացնելը Հայաստանում ապրող հազարավոր հեթանոսների ազգային, հոգևոր արժեքներին ուղղված անարգանք է։
«Եթե մենք տաճարը միայն որպես բիզնես ենք դիտարկում, ապա ինչու՞ հյուրանոց չկառուցենք Էջմիածնի, Գեղարդի կամ քրիստոնեական այլ արժեքների տարածքում»,- ասաց նա։
Փորձագետը նշեց` Գառնին հոգևոր արժեք է բոլոր հայերի համար` անկախ կրոնից։
Նրա կարծիքով` զբոսաշրջիկները Գառնի են գալիս ոչ թե հյուրանոցի համար, այլ տարածաշրջանում միակ հեթանոսական տաճարը տեսնելու ու շրջական բնությունը վայելելու նպատակով։
Լորենցի խոսքով` ապագա սերունդները նախորդների այդ քայլը չեն ների։
Նա նաև ուշադրություն դարձրեց, որ Գառնու տարածքում Արշակունիների (որոնց օրոք կառուցվել է տաճարը) զինանշանը պատկերելու փոխարեն հայտնվել է մի զինանշան, որը հեռու է հայ արքաների զինանշանից։
Նրա խոսքով` երբ այդ հարցով դիմել է ՀՀ մշակույթի նախարարության Պատմության և մշակույթի հուշարձանների պահպանության գործակալությանը, խորհուրդ են տվել «Վիքիպեդիայում նայել»։
Երգահան, «Հայկազունք» երաժշտական համույթի գեղարվեստական ղեկավար Գուսան Հայկազունն էլ (իրական անունը` Գագիկ Նազարյան) իր հերթին նշեց, որ մի քանի տարի առաջ, լինելով Հանրային խորհրդի անդամ, ակտիվորեն պայքարել է տաճարի տարածքում ռեստորան կառուցելու դեմ։
«Մենք հաջողության հասանք, թեև նախորդ նախարարն ուզում էր դա։ Ամեն նախարարի փոխվելու հետ Գառնու տաճարն ասես աչքի փուշ է դառնում», — ասաց Հայկազունին։
Հեթանոսների համար Գառնին սրբավայր է։ Նրանք տարին մի քանի անգամ տաճարի տարածքում իրենց ծեսերն են կատարում։
ՀՀ տնտեսական զարգացման և ներդրումների նախարարության զբոսաշրջության պետական կոմիտեում Sputnik Արմենիային հայտնեցին, որ հյուրանոցի կառուցման վերաբերյալ տեղեկություն չունեն, բայց պարզաբանումներ ստանալու համար արդեն դիմել են Մշակույթի նախարարությանը։
Մշակույթի նախարարության մամուլի ծառայությունում այս պահին այդպիսի տեղեկություն նույնպես չունեն։ Sputnik Արմենիային հայտնեցին, որ կփորձեն հարցը պարզել նախարարի հետ։
Արևի աստված Միհրին նվիրված տաճարը կառուցվել է առաջին դարի երկրորդ կեսին` Տրդատ I-ի օրոք։ 1679 թվականին երկրաշարժի հետևանքով տաճարը փլվել է, բայց 1970 թվականին վերականգնել են։ Վերականգնման համար օգտագործվել են տեղում պահպանված հատվածները, իսկ պակասող մասերը լրացվել են։ Տաճարը բազալտից է։
