ՀՀ 4–րդ նախագահի երդմնակալության արարողություն

Հայաստանի նախագահի երդմնակալությանը Ռուսաստանը ներկայացնում է Միխայիլ Շվիդկոյը

52
(Թարմացված է 12:42 09.04.2018)
Բացի Ռուսաստանի նախագահի հատուկ ներկայացուցչից, արարողությանը ներկա են նաև Դաշնային խորհրդի պատգամավորները։

ԵՐԵՎԱՆ, 9 ապրիլի — Sputnik. ՀՀ նախագահ Արմեն Սարգսյանի երդմնակալությանը պաշտոնական Մոսկվան ներկայացնում է Ռուսաստանի նախագահի միջազգային մշակութային համագործակցության գծով հատուկ ներկայացուցիչ Միխայիլ Շվիդկոյը, Sputnik Արմենիային հայտնեցին Ռուսաստանի դեսպանատնից։

Բացի նրանից, հանդիսավոր արարողությանը ներկա է ՌԴ Դաշնային ժողովի Դաշնային խորհրդի միջազգային հարցերով հանձնաժողովի անդամ Ռաֆայել Զինուրովը, ինչպես նաև Դաշնային խորհրդի Կոմիտեի նախագահի սոցիալական քաղաքականության հարցերով տեղակալ Իգոր Ղահրամանյանը։

Հայաստանի չորրորդ նախագահ Արմեն Սարգսյանի երդմնակալության արարողությունն այս պահին անցկացվում է Երևանի Կարեն Դեմիրճյանի անվան մարզահամերգային համալիրում։ Հանդիսավոր արարողությանը ներկա են մոտ 1200 մարդ, որոնց թվում բազմաթիվ հյուրեր կան արտերկրից։

Արմեն Սարգսյանը ծնվել է Երևանում 1953 թվականին։ 1976 թվականին ավարտել է Երևանի պետական համալսարանը ֆիզիկայի ֆակուլտետը։ 1984-85 թվականներին գործուղվել է Քեմբրիջ։ 1985-89 թվականներին դասավանդել Մոսկվայի, ինչպես նաև Գերմանիայի, Հունաստանի, ԱՄՆ-ի տարբեր բուհերում։ 1990 թվականին Արմեն Սարգսյանը Լոնդոնի և Քեմբրիջի համալսարանների հրավերով աշխատել է Բրիտանիայում։ Հայաստանի անկախության հռչակումից հետո առանցքային դիվանագետներից մեկն է դարձել։ Նա եղել է ՄԱԿ-ի և այլ միջազգային կառույցների անդամակցության ակունքներում։ Եղել է Բրիտանիայում Հայաստանի առաջին դեսպանը, համակարգել է եվրոպական երկրներում հանրապետության դեսպանների աշխատանքը։ 1996-97 թվականներին վարչապետ է եղել։ Սարգսյանը Դավոսի ֆորումի մշտական մասնակից է։ Էներգետիկ անվտանգության գլոբալ ֆորումի նախագահ, Հարվարդի համալսարանի Քենեդու կառավարման դպրոցի խորհրդի անդամ։ British Petroleum, Bank of America, Merril Lynch և այլ կազմակերպությունների գլխավոր խորհրդատու է եղել։

52
թեմա:
Հայաստանի Հանրապետության 4-րդ նախագահը (52)