ԵՐԵՎԱՆ, 2 ապրիլի — Sputnik. Հարավային ռազմական օկրուգի ավելի քան հազար զինվորական մասնակցում են Հայաստանում անցկացվող երկկողմանի զորավարժություններին։
Հայաստանում տեղակայված ՌԴ ԶՈւ հարավային ռազմական օկրուգի զինծառայողները ձմեռային ուսումնական շրջանի ամփոփիչ ստուգումների շրջանակում «Ալագյազ» զորավարժարանում մասնակցում են երկկողմանի մարտավարական զորավարժություններին։
Մեկ շաբաթվա ընթացքում ծառայողները, Հայաստանում 102-րդ ռազմակայանի հրամանատար գնդապետ Վլադիմիր Ելկանովի հրամանատարությամբ, մարտավարական գործողություններ կմշակեն` հետախուզահարվածային միավորումների կազմում` հրետանու, զորքային հակաօդային պաշտպանության ու ավիացիայի աջակցությամբ։
Ստորաբաժանումների գործողություններին հետևելու են անօդաչու թռչող սարքերի հաշվարկի միջոցով. բոլոր տվյալները հենց այդ պահին փոխանցվելու են հրամանատարական կետ, ինչը թույլ կտա օբյեկտիվորեն գնահատել միավորման ստորաբաժանումների գործողությունները ուսումնական մարտի ընթացքում, նշում է ՌԴ պաշտպանության նախարարությունը։
«Անդրկովկասում անցկացվող երկկողմանի մարտավարական զորավարժություններին կմասնակցեն ավելի քան հազար զինծառայող ու մոտ 300 միավոր հատուկ ռազմատեխնիկա, այդ թվում նաև` կործանիչ, բանակային ու անօդաչու ավիացիա», — հայտնում են պաշտպանության նախարարությունից։
Հայաստանի հյուսիսում՝ Գյումրի քաղաքում տեղակայված 102-րդ ռազմակայանը, մարտական հերթապահություն է իրականացնում ԱՊՀ մասնակից պետությունների ՀՕՊ Միավորված համակարգի շրջանակներում: 2010-ի օգոստոսի 20-ին բազայի տեղակայման մասին պայմանագրի գործողության ժամկետը երկարաձգել է մինչև 2044 թվականը. արձանագրությունը նախատեսում է նաև ընդլայնել աշխարհագրական եւ ռազմավարական պատասխանատվությունը: Բազան հագեցած է ԶՀՀ-300В, Բուկ Մ1-2, Միգ-29 կործանիչներով, Մի-8МТ կարգի ռազմա-տրանսպորտային ուղղաթիռներով և հարվածային Մի-24Պ-ով:
