ԵՐԵՎԱՆ, 18 մարտի – Sputnik, Արմենուհի Մխոյան. 80–ամյա Հենրիկ պապը ՌԴ քաղաքացի է, բայց այս պահին բնակվում է Գյումրիում: Չնայած նա ունի տեսողական ու լսողական խնդիրներ, սակայն, կարևորելով ՌԴ նախագահի ընտրությունները, առավոտ կանուխ շտապել է Գյումրու ՌԴ հյուպատոսարանի տարածքում գործող ընտրատեղամաս՝ իր քաղաքացիական պարտքը կատարելու:
Sputnik Արմենիայի թղթակցի հետ զրույցում Հենրիկ պապը նշեց, որ չնայած ծեր է ու տեսողության և լսողության հետ կապված որոշ խնդիրներ ունի, բայց դա չի խանգարում՝ ՌԴ ապագայի մասին մտածելու: «Ինչպես չգամ ու չմասնակցեմ, չէ՞ որ ՌԴ քաղաքացի եմ, ու, ինչպես ցանկացած քաղաքացի, ես պարտավոր եմ իմ պարտքը կատարել, սա մեզ համար է, մեր ու ապագա սերունդների»,- նշեց նա՝ ուրախությամբ ու հպարտությամբ փաստելով, որ ինքն արդեն կատարել է իր քաղաքացիական պարտքը՝ ընտրելով հանուն լավ գաղափարի:
Հանուն բարեկեցիկ Ռուսաստանի Գյումրիում Ռուսաստանի Դաշնության հյուպատոսարանի տարածքում տեղակայված թիվ 8031 ընտրատեղամասում քվեարկելու էին եկել նաև Փանիկ գյուղից: Չցանկանալով ներկայանալ` ընտրողները նշեցին, որ 20 կմ հեռավորություն կտրել-անցել են` իրենց պարտքը կատարելու համար: «Մենք աշխատանքի բերումով ավելի շատ ՌԴ–ում ենք լինում: Այս ընտրությունները շատ կարևոր են ինչպես ՌԴ-ի այնպես էլ Հայաստանի հետ հետագա համագործակցության համար»,- նշեցին նրանք:
Ի դեպ` ընտրողների մեծ մասը ՌԴ քաղաքացիություն ունեցող հայեր էին: Այս անգամ ակտիվությունն ընտրատեղամասի բացման հենց առաջին իսկ րոպեից նկատվեց:
Հավելենք, որ ընտրողների մեջ ինչպես Շիրակի ու Լոռու մարզերի բնակիչներն են կամ այս ընթացքում այստեղ գտնվող ու հարևան Վրաստանից եկած ՌԴ քաղաքացիները։