ԵՐԵՎԱՆ, 10 մարտի — Sputnik. Արմավիրի մարզում պտղատու ծառերը` ծիրանենին ու սալորենին, արդեն ծաղկել են։ ՀՀ գյուղատնտեսության փոխնախարար Աշոտ Հարությունյանն անձամբ է այցելել Արմավիր ու համոզվել, որ նախորդ երկու օրերին հանրապետության տարածքում տեղացած ձյունը չի վնասել ծառերը։
«Ծիրանենին արդեն սկսել է բացվել Արմավիրի ցածրադիր վայրերում, որտեղ ջերմաստիճանի կտրուկ նվազում տեղի չի ունեցել։ Թեև ցրտել է, բայց դրական ջերմաստիճանը պահպանվում է»,- ասաց նա` հավելելով, որ 0-ից ցածր ջերմաստիճան է գրանցվել ու ձյուն է տեղացել բարձրադիր հատվածներում, որտեղ ծառերը դեռ չեն ծաղկել, հետևաբար այս ցուրտը դրանց որևէ կերպ չի վնասել։
Հարությունյանը նշեց նաև, որ չնայած տեղումներին, գյուղացիները մեծ ոգևորությամբ աշխատում են իրենց այգիներում։
«Բոլոր անհրաժեշտ աշխատանքներն արել են, բուժման, էտի աշխատանքներն արված են, խաղողի էտը ևս հունի մեջ է։ Որևիցե վտանգ չկա, վնասներ էլ չունենք»,- ասաց գյուղփոխնախարարը։
«Հիդրոմետ» ծառայության կանխատեսումները, Հարությունյանի խոսքով, ևս հուշում են, որ առաջիկա օրերին ծաղկած ծառերին վտանգ չի սպառնում։
Ի դեպ, մեր զրուցակիցը նշեց նաև, որ Հայաստանի որոշ տարածքներում գյուղացիներն արդեն նաև կարտոֆիլ ու գարնանացան ցորեն և գարի են ցանել։ Այս ցանքատարածքների համար ևս տեղումնառատ եղանակը ոչ միայն վտանգավոր չէ, այլև օգտակար է և կնպաստի ջրի սակավ պաշարները լրացնելուն։
Հակառակ նախապես արվող մռայլ կանխատեսումներին, աշնանացան ցորենը ևս, փոխնախարարի դիտարկմամբ, այս տարի լավ բերք կապահովի։ Չոր ձմեռը որևէ կերպ չի վնասել այս ցանքատարածությունները։
Դե իսկ ով չի հասցրել աշնանը ցորեն ցանել, կարող է անել գարնանը։
Հարությունյանը նշեց, որ արդեն 10 օր գյուղնախարարությունը սկսել է ցորենի սերմացու տրամադրել մարզպետարաններին` այն սուբսիդավորման պայմաններով գյուղացիներին տրամադրելու համար։
Սերմացուից բացի, գյուղացին այս տարի նաև էժան գներով խոստացած պարարտանյութերը կստանա մարզպետարանից, եթե նախապես հայտ ներկայացնի ու հաշվառվի։
