ԵՐԵՎԱՆ, 23 փետրվարի — Sputnik, Արմենուհի Մխոյան. Գյումրիում 102-րդ ռուսական ռազմաբազայի զինծառայողի սպանության գործով դատական նիստը փետրվարի 23-ին կրկին հետաձգվեց։ Այս անգամ դատական նիստին ներկա էր պետմեղադրող Արթուր Չախոյանը, սակայն հարգելի պատճառով ներկա չէր ամբաստանյալի շահերի պաշտպան Գուրգեն Հարությունյանը: Վերջինս դատարանին տեղեկացրել էր, որ դատական նիստին չի կարող ներկա լինել հարազատի մահվան պատճառով: Հաջորդ դատական նիստը նշանակվեց մարտի 12-ին:
Հիշեցնենք, որ առաջին դատական նիստը տեղի էր ունենալու փետրվարի 12-ին, Շիրակի մարզի ընդհանուր իրավասության դատարանում, սակայն դատը չկայացավ՝ մեղադրող կողմի բացակայության պատճառով: Ըստ տեղեկությունների` պետմեղադրողը դատական նիստի մասին ժամանակին տեղեկացված չի եղել՝ ծանուցումը ստացել է հենց նիստի օրը, ինչի պատճառով էլ նիստին ներկա չէր: Նիստին ներկա էին ամբաստանյալ Արման Ջանջուղազյանը և ամբաստանյալի շահերի պաշտպան Գուրգեն Հարությունյանը:
Ըստ մեղադրանքի՝ Արման Ջանջուղաղյանն «Իսլամական պետություն» ահաբեկչական խմբավորման համակիր ներկայացած, քննությամբ դեռևս չպարզված անձանց օժանդակությամբ 2017թ.–ի ապրիլի 22-ին, ժամը 17:30-ի սահմաններում կրոնական մոլեռանդության շարժառիթով ապօրինաբար, կյանքից զրկելու դիտավորությամբ Գյումրիում դանակով մի քանի անգամ հարվածել է ՌԴ քաղաքացի, ռուսական 102-րդ ռազմաբազայի զինծառայող Դմիտրի Յալպաևին՝ սպանելով նրան: Մեղադրանք է առաջադրվել ՀՀ Քրեական օրենսգրքի 235-րդ հոդվածի 4-րդ մասի եւ 104-րդ հոդվածի 2-րդ մասի 13-րդ կետի հատկանիշներով:
