ԵՐԵՎԱՆ, 17 հունվարի — Sputnik. Հայտնի դերասանուհի և հեռուստահաղորդավար Զոյա Բերբերը ներխուժել է իր համար անծանոթ Երևան և մեկ օրվա ընթացքում հասցրել է սիրել Հայաստանի մայրաքաղաքը։
«Երբ ջրհեղեղից հետո ջուրը սկսեց հետ քաշվել, Նոյը դուրս եկավ տապանից ու բացականչեց` երևաց, այսինքն`ցամաքը երևաց։ Երախտապարտ ժառանգները հենց այդպես էլ անվանեցին բնակավայրը։ Կռահեցի՞ք, թե որ քաղաքի մասին է խոսքը։ Դե, իհարկե, Երևանի… Եվ ես ընդամենը մեկ օր ունեմ Հայաստանի արևառատ մայրաքաղաքին սիրահարվելու համար», — այսպես է սկսել ծրագրի հերթական թողարկումը Բերբերը։
Աղջիկը շրջել է «Կասկադ» համալիրում։
«Զարմանալի շինություն է, մի ամբողջ թանգարան սարի մեջ։ Ի դեպ, ընթացքում բացարձակ անվճար կարելի է դիտել ժամանակակից արվեստի թանգարանի ցուցահանդեսը», — նշել է աղջիկը։
Ազատության հրապարակում զբոսնելու ընթացքում նա շեշտել է, որ օպերայի և բալետի թատրոնը Երևանի ամենագեղեցիկ շենքերից մեկն է։
«Կառուցվել է ճարտարապետ Ալեքսանդր Թամանյանի նախագծով… Այստեղ` հրապարակում, շատ են գեղեցիկ սրճարանները, որոնք բացվում են քաղաքի արթնանալուն պես… Երևանը կոֆեմանների համար կատարյալ վայր է, քանի որ հայերի համար սուրճը պարզապես ըմպելիք չէ, այլ մի ամբողջ արարողություն։ Մեկ բաժակ սուրճ խմելու են հավաքվում հարազատները, մտերիմները, ընկերները` գործերը քննարկելու կամ պարզապես շփվելու համար», — ասել է Զոյան։
Հեռուստահաղորդավարը եղել է Սևանում, ինչպես նաև Էջմիածնում։
«Այս վայրը նաև Վաղարշապատ է կոչվում։ Նրանք, ովքեր հիանում են հին հռոմեական ավերակներով, իրականում Էջմիածինը չեն տեսել… Հայաստանն աշխարհի առաջին քրիստոնյա պետությունն է։ Էջմիածնի վանքը կառուցել են քրիստոնեության ընդունումից անմիջապես հետո` IV դարում… Իսկ Մայր տաճարի տեղը, լեգենդի համաձայն, մատնանշել է Հիսուս Քրիստոսը», — պատմել է նա։
Ծրագրի վերջում հեռուստահաղորդավարուհին նշել է, որ օրը վառ էր ու հագեցած։
Դեռ Ամանորից առաջ Զոյան Instagram-ի իր էջում հիշատակել էր Երևանի մասին։
«Շուտով Նոր տարի է, իսկ ես Երևանն եմ հիշում.. Լավ քաղաք է, ողջույններ եմ ուղարկում։ Ճանապարհորդել ու նոր բաներ տեսնել, ծանոթանալ, զբոսնել և լսել, թե ինչով է ապրում այլ երկիր. այ թե ինչն է ցանկալի։ Բացի այդ, եթե ընտանիքով ես, ընկերների հետ… Թող տոմսերն ավելի մատչելի լինեն, վիզաները հասանելի, միջանցքները` կանաչ։ Սկսում եմ ցանկանալ և երազանք պահել։ Գնացի՜», — գրել է նա։
Աղջկա գրառմանն արձագանքել էին նրա էջի բաժանորդները. «Հայրենիքս է, հզոր է, ես էլ շուտով այնտեղ կայցելեմ, բայց Ռուսաստանում եմ ապրում», «Ես հայուհի եմ, ինչ լավ է, որ դուք սիրեցիք մեր քաղաքը», «Այնտեղ վերջերս եմ եղել, շատ եմ հավանել»։
«Մեկ օր» նախագծին աջակցում է Ռուսաստանում Հայաստանի դեսպանատունն ու ՀՀ նախագահի աշխատակազմի Հանրային կապերի և տեղեկատվության կենտրոնը։
