ԵՐԵՎԱՆ, 19 դեկտեմբերի — Sputnik. Հայաստանում հայտնաբերված եզակի գտածոները հերքել են մարդու առաջացման մասին նախկինում ընդունված բոլոր տեսությունները, ասվում է «Կուլտուրա» ռուսական հեռուստաալիքի պատրաստած «Որտեղի՞ց է եկել մարդը» վավերագրական ֆիլմում։
«Տրակտորը հնագետի հիմնական թշնամին է, սակայն մի օր երջանիկ պատահականությամբ այն դառնում է ժամանակի մեքենա, և այդժամ սենսացիաներն են ի հայտ գալիս, ինչպես դա եղավ 2014 թվականին Նոր Գեղի գյուղի մոտ` Հրազդանի կիրճում», – ասում է հաղորդման հաղորդավարը։
Ինչպես ֆիլմում նշում է պեղումներ իրականացնող հայկական արշավախմբի ղեկավար Բորիս Գասպարյանը, գտածոները պատահաբար են հայտնաբերվել։
«Մենք դրանք երբեք չէինք տեսնի, չէինք բացահայտի, եթե զինվորականները ճանապարհ չհարթեին տրակտորի օգնությամբ։ Այն կտրեց լավայի հոսքը և բացեց նրա տակ գտնվող հուշարձանը», – նշում է նա։
2014 թվականի ամռանը գիտնականների միջազգային խումբը, որի մեջ կային ամերիկացիներ, իռլանդացիներ, հայեր, Նոր Գեղի գյուղի մոտ ավելի քան 2 հազար բացառիկ գտածո է հայտնաբերել, որոնք հարյուր հազար տարվա վաղեմություն ունեն։ Նոր Գեղին գիտնականների կողմից քարե դարի ինքնատիպ «տեխնոպարկ» է ճանաչվել։
«Սրանք նախնադարյան մարդկանց պատկանող աշխատանքի քարե գործիքներ են։ Գիտնականները պարզել են, որ այս գործիքներն ավելի քան 350 հազար տարվա պատմություն ունեն։ Դա անհավատալի է, սակայն նաև անհերքելի», – պատմում է հաղորդավարը։
Դրանք այս տարածաշրջանի գործիքներ էին, այդ ժամանակահատվածում Հայաստանում բնակվող մարդիկ տեխնոլոգիապես շատ զարգացած են եղել։
Ֆիլմում խոսվում է նաև Արենի քարանձավային համալիրի տարածքում հայտնաբերած սենսացիոն գտածոների մասին, մասնավորապես, աշխարհի ամենահին կոշիկի և հնագույն գինեգործական արտադրության մասին։
«Եգիպտական բուրգերից հազար տարով մեծ կաշվե կոշիկի վրա կապեր և անցքեր են պահպանվել։ Նույն շրջանում հայտնաբերվել էր նաև գինեգործության արդյունաբերական համալիրը, այսինքն` աշխարհի ամենահին գինու գործարանը, որը 7 հազար տարվա պատմություն ունի» – գրում հեղինակը։
Նա ընդգծում է, որ 2016 թվականի վերջին ռուս գիտնականները Հայաստանում նախամարդու կայանատեղի են գտել, որը 2 մլն տարեկան է`Աֆրիկայի ամենավաղ բնակավայրերի հասակակիցն ու ամենահին կեցավայրը Եվրասիայում։
ՀՀ Լոռվա մարզում իրականացրած պեղումների արդյունքում, Դեբետ գետի մերձակայքում ևս մեկ գտածո է հայտնաբերվել` «Հաղթանակ» հուշարձանը։ Սա երրորդ կացարանն է, որը գիտնականների ենթադրությամբ, թվագրվում է 800 հազարից 1 մլն տարի։
Հիմքեր կան պնդելու համար, որ մարդկային մշակույթի զարգացումը այդ տարածքում տեղի էր ունենում առանց որևէ այլ մշակույթների ազդեցությունների։
