ԵՐԵՎԱՆ, 14 դեկտեմբերի — Sputnik. ՀՀ տարածքում ահաբեկչական գործողություններ իրականացնելու մեղադրանքով ազգությամբ հայ ԱՄՆ քաղաքացու հետախուզման գործի հետ կապված ԱՄՆ դեսպանատունն աշխատում է Հայաստանի իրավապահների հետ: Այս մասին հայտարարել է ԱՄՆ դեսպանատունը։
«Քննության շահերից ելնելով՝ այս պահին հավելյալ տեղեկություններ չենք կարող տրամադրել», նշված է հայտարարության մեջ:
Նշենք` ՀՀ ազգային անվտանգության ծառայությունն ավելի վաղ հայտնել էր, որ ազգությամբ հայ, ԱՄՆ քաղաքացի Ռ.Ք.-ն 2017 թվականի սեպտեմբերին «Ֆեյսբուք» սոցիալական ցանցում գրանցել է «Martin Avagyan» օգտատիրոջ կեղծ տվյալներով անհատական էջը, որի միջոցով հրապարակել է նյութեր` «Մարտիկներ հանուն արդարության» անվանմամբ խմբավորում ձևավորելու, խմբավորման գործունեության մարտավարության, դրա անդամների կարգապահության, անվտանգության և գաղտնապահության կանոնների մասին։
Այդ անձն այժմ հետախուզման մեջ է, քանի որ հիմնավորվել է` նույն անձը խորհուրդներով, ցուցումներով, ինչպես նաև միջոցներ տրամադրելով նախապատրաստել է հանցակիցների միջոցով ՀՀ տարածքում ահաբեկչական գործողությունների իրականացում։
