ԵՐԵՎԱՆ, 17 նոյեմբերի — Sputnik. Նախագահի՝ այսօրվա հրամանագրով Ռումինիայում Հայաստանի Հանրապետության արտակարգ և լիազոր դեսպան է դարձել Սերգեյ Մինասյանը։
«Ղեկավարվելով 2005 թվականի փոփոխություններով Հայաստանի Հանրապետության Սահմանադրության 55-րդ հոդվածի 8-րդ կետով` որոշում եմ. Սերգեյ Մինասյանին նշանակել Ռումինիայում Հայաստանի Հանրապետության արտակարգ և լիազոր դեսպան (նստավայրը՝ Բուխարեստ)»,- գրված է հրամանագրում:
Սերգեյ Մինասյանը քաղաքագետ է, Կովկասի ինստիտուտի փոխտնօրենը։
Նա իր ֆեյսբուքյան էջում շնորհակալություն է հայտնել այդպիսի պատասխանատու գործ իրեն վստահելու համար։
«Ուրախ եմ, որ տարիներ ի վեր զբաղվելով միջազգային հարաբերությունների, մասնավորապես, եվրոպական և եվրոատլանտյան քաղաքականության ուսումնասիրությունների հարցերով՝ ներկայացնելու եմ Հայաստանը մի երկրում, որը հանդիսանում է աշխարհագրորեն ամենամոտ ԵՄ, ինչպես նաև Սևծովյան տարածաշրջանում ՆԱՏՕ անդամ ամենաակտիվ երկրներից մեկը»,- գրել է Մինասյանը։
Նա նշել է, որ մեր երկրի հետ պատմական դարավոր սերտ և ջերմ կապերի հետ մեկտեղ, Ռումինիան նաև առաջին երկիրն է, որի հետ Հայաստանը դեռ 1991թ․ դեկտեմբերի 17-ին հաստատել է դիվանագիտական հարաբերություններ։ Պատահական չէ նաև, որ Հայաստանը Ռումինիայում ի սկզբանե ներկայացրել են ամենափորձառու և արհեստավարժ դիվանագետները, ինչը շատ պարտավորեցնող է և ավելի մեծ պատասխանատվություն է պահանջում: