Հյուսիսային պողոտա

Փախստականների համար Հայաստանն ամենահյուրընկալ ու ապահով երկիրն է

114
(Թարմացված է 19:25 26.08.2017)
Հայաստանը հետխորհրդային տարածքում միգրանտների համար ամենահյուրընկալ երկիրն է: Այս մասին փաստում են «Gallup» միջազգային սոցիոլոգիական ծառայության հետազոտության արդյունքներն ու Հայաստան տեղափոխված մարդիկ:

ԵՐԵՎԱՆ, 26 օգոստոսի — Sputnik. Սիրիահայ Լուսինե Բարսումյանն ընտանիքի հետ Հայաստան տեղափոխվեց սիրիական պատերազմից հետո: Հիմա գոհ է. ինքն էլ, ամուսինն էլ աշխատանք ունեն, երկու երեխաներին լավ են պահում:

«Կարոտում ենք Հալեպը, բայց մեր կյանքն այստեղ շատ ավելի լավ է»,- խոստովանում է Լուսինեն:

Հայաստանը սիրով ընդունեց սիրիահայերին, քանի որ նրանք նոր շունչ բերեցին իրենց հետ: Սիրիահայերը լավ են տիրապետում արհեստներին, չես տեսնի մի սիրիահայի, որը հացի խնդիր ունենա: Ասում են՝ նրանք ոսկի ձեռքեր ունեն:

Սիրիայի պատերազմից հետո Հայաստանն ընդունեց մոտ 22 հազար սիրիահայի:

Մեր երկրում իրենց զգում են ինչպես տանը նաև աֆրիկացիները: Ավելի վաղ Sputnik Արմենիան զրուցել էր գվինեացի Լամարանա Բահի հետ, որն արդեն 7 տարի է, ինչ Հայաստանում է:

«Ես մի մարդու էի ճանաչում, որն ինձ ասաց՝ Հայաստանը հանգիստ տեղ է, հայերը՝ բարի: Ինձ էլ հենց դա էր պետք»,- պատմեց Լամարանան:

Հայաստանում ապրելու մեծ ցանկություն ունի ազգությամբ ռուս մի կին, անունը՝ Ժենյա: Նա, իհարկե, ոչ թե փախստականի, այլ զբոսաշրջիկի կարգավիճակ ունի, բայց դեմ չէր լինի ապրել Երևանում: Sputnik Արմենիայի հետ զրույցում պատմեց, որ երբ առաջին անգամ եկավ Հայաստան, սիրահարվեց մեր երկրին:

«Մեզ մոտ գիշերներն այսքան հանգիստ չես քայլի: Հենց մութն ընկնում է, բոլորը շտապում են տուն: Իսկ Երևանում մինչև ուշ գիշեր միայնակ կարող ես շրջել փողոցներով, և ոչ մի վտանգ չկա»,- պատմեց նա:

«Gallup» միջազգային սոցիոլոգիական ծառայության հետազոտության արդյունքների համաձայն՝ Հայաստանում փախստականների ընդունման ինդեքսը կազմում է 5.78 միավոր: Սա այն դեպքում, երբ Թուրքմենստանն ունի 5.36 միավոր, Ուզբեկստանը՝ 4.9: Ըստ հետազոտության՝ միգրանտների համար ամենաանհյուրընկալ երկրներից են Լատվիան, Ռուսաստանը և Լիտվան:

114