ՀՀ քննչական կոմիտե

17–ամյա պատանին թրաֆիքինգի է ենթարկել համագյուղացի երեխաներին

120
Արմավիրի մարզի Մուսալեռ գյուղից 17-ամյա մի պատանի շահագործման ենթարկելու նպատակով Երևան է փոխադրել համագյուղացի երեք անչափահաս երեխաներին, որոնցից մեկը տառապում է էպիլեպսիա հիվանդությամբ։

ԵՐԵՎԱՆ, 15 օգոստոսի — Sputnik. Արմավիրի մարզի Մուսալեռ գյուղի 17-ամյա բնակիչը թրաֆիքինգի է ենթարկել 14, 10 և 9 տարեկան համագյուղացի երեք երեխաների։ Այս մասին հայտնում է ՀՀ քննչական ծառայությունը։

Նա խաբեությամբ՝ ճոճանակ նստելու և զվարճանալու պատրվակով 2016թ. ամռանը Մուսալեռ գյուղից երեխաներին տեղափոխել է «Զվարթնոց» օդանավակայանի հարակից տարածք։ Այստեղ նա երեխաներին ստիպել է օդանավակայանի ավտոկայանատեղիում կայանված ավտոմեքենաների վարորդներից մուրացկանությամբ գումար հավաքել ու հանձնել իրեն: Իսկ երբ երեխաները մերժել են, պատանին ծեծել է նրանց, ստիպել մուրացկանությամբ զբաղվել, իսկ ինքը որոշակի տարածությունից հսկել է նրանց:

Քննչական կոմիտեն հայտնում է նաև, որ երեխաներից մեկը տառապել է «Իզոլացված էպիլեպսիա» հիվանդությամբ։

Շուրջ երկու ժամ գումար մուրալուց հետո երեխաներն ամբողջ հավաքած գումարը հանձնել են շահագործողին։ Վերջինը հավաստիանալու համար, որ նրանց մոտ այլ գումար չի մնացել, նախ ստուգել է երեխաների գրպանները, ապա հավաքված գումարից մի չնչին մասը տվել նրանց։

Դեպքի առթիվ ՀՀ քննչական կոմիտեի հատկապես կարևոր գործերի քննության գլխավոր վարչությունում հարուցված քրեական գործի նախաքննությունն ավարտվել է։

17-ամյա տղային մեղադրանք է առաջադրվել բռնություն գործադրելով երկու կամ ավելի երեխաների շահագործելու համար:

Քրեական գործը՝ մեղադրական եզրակացությամբ, ուղարկվել է դատարան:

120