Կարեն Կարապետյան

Շախ և մատ չարախոսներին. վարչապետն արձակուրդը կանցկացնի Արցախում

662
(Թարմացված է 20:29 16.08.2017)
ՀՀ վարչապետ Կարեն Կարապետյանն օգոստոսի 15–ին մեկնել է կարճատև արձակուրդի։ Վարչապետի մամուլի խոսնակ Արամ Արարատյանը հայտնել է, թե որտեղ է իր հանգիստն անցկացնելու ՀՀ գործադիրի ղեկավարը։

ԵՐԵՎԱՆ, 15 օգոստոսի–Sputnik. Վարչապետ Կարեն Կարապետյանը 3 օրով մեկնել է հանգստի։ Նա հանգիստն անցկացնելու համար նախընտրել է Արցախը։

«Հանգստի ընթացքում Կարեն Կարապետյանը շարունակելու է մշտական կապի մեջ մնալ կառավարության անդամների հետ»,–իր հաղորդագրության մեջ նշել է վարչապետի մամուլի խոսնակ Արամ Արարատյանը։

Տեղեկացնենք, որ վերջերս մամուլում հրապարակումներ կային, թե Կարեն Կարապետյանը, լինելով արցախցի, հանգստի չի մեկնում իր ծննդավայր։

«Ապրիլյան պատերազմից հետո մեր պաշտոնյաների հայրենասիրությունը 3 ամիս տևեց։ Ժամանակին գոնե հորդորում էին, թե Արցախում արձակուրդն անցկացրեք, այս տարի չեն էլ հորդորում։ Իսկ, օրինակ, Անդրանիկ Մարգարյանը միշտ ասում էր` Թուրքիա չգնաք, Հայաստանում հանգստացեք։ Տիգրան Սարգսյանը սոցփաթեթները մտցրեց և խրախուսում էր Արցախ գնալը։ Արգամիչն էլ մշտապես հայտարարում էր, հորդորում Արցախում արձակուրդ անցկացնել, որ միջոցառում–բան էր լինում, բոլորին հավաքում–բերում էր Արցախ։ Իսկ, այ Կարապետյանը, թեև ղարաբաղցի է, բայց պետքն էլ չէ»,–գրել էր «Հրապարակ» թերթը` մեջբերելով արցախցի պաշտոնատար անձանցից մեկին։

Փաստորեն, ի հակադրություն ասեկոսեների, վարչապետը շախ և մատ արեց։

662