Սևան

Արծվիկ Մինասյան. «Մենք Սևանը չենք կորցնի»

85
(Թարմացված է 23:23 06.07.2017)
Մենք Սևանը չենք կորցնի, Sputnik Արմենիայի հետ զրույցում նման համոզմունք հայտնեց բնապահպանության նախարար Արծվիկ Մինասյանը այն բանից հետո, երբ ԱԺ–ն հավանություն տվեց Սևանից բաց թողնվող ջրի ծավալն ավելացնելու մասին օրենսդրական նախաձեռնությանը։

ԵՐԵՎԱՆ, 6 հուլիսի — Sputnik. Սևանը չենք կորցրել, չենք կորցնի, էկոլոգիական աղետ էլ չի լինի, Sputnik Արմենիայի հետ զրույցում հայտարարեց բնապահպանության նախարար Արծվիկ Մինասյանը, երբ ԱԺ–ն հաստատեց Սևանից բաց թողնվող ջրի ծավալն ավելացնելու մասին օրենսդրական նախաձեռնությունը։

Նախարարն անդրադարձավ նաև բուռն քննարկման առիթ դարձած ՀԷՑ-ին, թե բնապահպանության դաշնակցական նախարարը դեմ է կառավարության նախաձեռնությանն այն դեպքում, երբ ՀՅԴ խմբակցությունը նախագծին կողմ է քվեարկել։

«Այդ որոշումը դիտարկել որպես ինտրիգ կառավարության անդամների միջև կամ կոալիցիայի մեջ ճեղք գտնելու՝ ճիշտ չէ»,– ասաց նախարարը։

Իրականում, նրա խոսքով, դրական է, որ արդյունավետ քննարկում է տեղի ունենում։ Տեսակետների բախումն էլ, ըստ նրա, պետք է ողջունել և ոչ թե դարձնել թիրախ։

Բնապահպանության նախարարությունն էլ, նրա մեկնաբանմամբ, դեմ չի եղել ջուրը 100 մլն խմ–ով ավելացնելուն։

«Բայց շատ կարևոր է, որ այդ հավելյալը հիմնված լինի օրենքով նախատեսված հիմքերի հստակ ձևակերպման վրա և լինի վերահսկելի»,– ասաց նախարարը։

Քանի որ բացթողնման այդ ծավալը հիմնական կանոնից բացառություն է, նախարարի համոզմամբ, այն չի կարող բնապահպանական ռիսկ չպարունակել, ուստի ինքն էլ` որպես այդ ոլորտի պատասխանատու, տվել է հավանական ռիսկի բացասական ազդեցության մասին կարծիք։

© Sputnik. Նելլի Դանիելյան, Կարեն Եփրեմյան
Արծվիկ Մինասյանը վստահեցնում է` Սևանը չենք կորցնի
85