Երկրաշարժ

Հայաստանը մի քանի օր շարունակ ցնցվել է երկրաշարժից

11
(Թարմացված է 12:46 06.07.2017)
Հունիսի 29-ից հուլիսի 5-ը Հայաստանի տարածքում գրանցվել է 4 երկրաշարժ։

ԵՐԵՎԱՆ, 6 հուլիսի — Sputnik. Հունիսի 29-ից մինչև հուլիսի 5-ը Սեյսմիկ պաշտպանության ծառայության (ՍՊԾ) սեյսմոլոգիական ցանցի կողմից գրանցված երկրաշարժերից 15-ի համար որոշվել են օջախի հիմնական պարամետրերը: Այս մասին հայտնում են ՍՊԾ գործակալությունից։

Տեղի ունեցած սեյսմիկ իրադարձություններից 4-ը գտնվում են Հայաստանի Հանրապետության տարածքում՝

  • հունիսի 29-ին, ժամը 05:41-ին Գառնի գյուղից 5 կմ դեպի հյուսիս-արևմուտք,
  • հունիսի 29-ին, ժամը 10:41-ին Արագածավան գյուղից 14 կմ դեպի հյուսիս, զգացվել է Արագածոտնի մարզի մի քանի գյուղերում, մասնավորապես՝ Արագածավանում և Սորիկում՝ 4 բալ, Թլիկում և Գետափում՝ 3-4 բալ, Հակկոյում՝ 3 բալ ուժգնությամբ,
  • հունիսի 30-ին, ժամը 14:07-ին Մարտունի քաղաքից 20 կմ դեպի հարավ-արևելք,
  • հուլիսի 4-ին, ժամը 10:21-ին Գյումրի քաղաքից 16 կմ դեպի հյուսիս-արևելք, զգացվել է ՀՀ հյուսիսում, մասնավորապես, Գյումրի, Ստեփանավան, Արթիկ քաղաքներում, Կամո, Մայիսյան, Քեթի, Շիրակ, Ախուրյան, Ջաջուռ, Մարմաշեն, Կապս, Աշոցք համայնքներում՝ 4-5 բալ ուժգնությամբ:

Տարածաշրջանում. 3 բալ ուժգնությամբ գրանցվել է 6 երկրաշարժ: Երեք բալ ուժգնությամբ տեղի է ունեցել 4 ստորգետնյա ցնցում: Հունիսի 30-ին 2.4 մագնիտուդով երկրաշարժ է տեղի ունեցել Իրան-Թուրքիա սահմանային գոտում՝ Մակու քաղաքից 36 կմ դեպի հյուսիս-արևմուտք, և 2.6 մագնիտուդով` Իրանի Ահար քաղաքից 19 կմ դեպի հյուսիս-արևելք: Հաջորդ օրը Իրանի Խոյ քաղաքից 15 կմ դեպի արևելք գտնվող էպիկենտրոնով երկրաշարժն ունեցել է 2.3 մագնիտուդ:

Հուլիսի 4-ին Թուրքիայում նույն մագնիտուդով երկրաշարժ է գրանցվել Վան քաղաքից 35 կմ դեպի հյուսիս-արևմուտք: Հուլիսի 1-ին 4 բալ ուժգնությամբ (2.9 մագնիտուդ) երկրաշարժեր են տեղի ունեցել Վրաստանի Բորժոմի քաղաքից 21 կմ դեպի հյուսիս-արևելք և Վրաստան-Ադրբեջան սահմանային գոտում՝ Ծնորի քաղաքից 44 կմ դեպի հարավ-արևելք:

Տարածաշրջանից դուրս. 6.0 մագնիտուդով գրանցվել է 2 երկրաշարժ, 2-ն էլ` Խաղաղ օվկիանոսի ավազանում: Առաջինը տեղի է ունեցել հունիսի 29-ին Նոր Զելանդիայի հյուսիսում գտնվող Կերմադեկ կղզիներում: Հաջորդ օրը գրանցված երկրորդ ուժեղ սեյսմիկ իրադարձության էպիկենտրոնը գտնվում է Էկվադորի ափամերձ գոտում: Երկրաշարժերի հետևանքով զոհեր և ավերածություններ չկան:

11