ԵՐԵՎԱՆ, 26 հունիսի — Sputnik. ՌԴ պետդումայի խոսնակ Վյաչեսլավ Վոլոդինն ու ՀՀ ԱԺ նախագահ Արա Բաբլոյանը խոսել են երկու խորհրդարանների կապերի զարգացման և համագործակցության նոր ձևաչափեր փնտրելու մասին։ Այս մասին հայտնում է ՌԻԱ Նովոստին։
Հանդիպումը տեղի է ունեցել Սեուլում, որտեղ տարբեր երկրների պատվիրակությունները մասնակցում են Եվրասիայի երկրների խոսնակների երկրորդ խորհրդակցությանը։
«Հայաստանի հետ կապող թելերը շատ են, Հայաստանը մեր ռազմավարական գործընկերն է։ Հուսով եմ, որ առկա հարաբերությունները մենք կզարգացնենք», – ասել է Վոլոդինը։
ՀՀ ԱԺ խոսնակն իր հերթին ընդգծել է, որ ՌԴ–ն ու Հայաստանը ոչ միայն ռազմավարական գործընկերներ են, այլև բարեկամ երկրներ։
«Սա հին բարեկամություն է։ Եվ ժամանակը, կարելի է ասել` հարյուրամյակներն ապացուցել են, որ անկախ նրանից, թե ինչ դժվար իրավիճակներում ենք եղել մենք, բարեկամի աջակցությունը միշտ զգացվել է, և մեր երկիրն ու ժողովուրդը մշտապես զգացել են ռուսական աջակցություն», – նշել է Բաբլոյանը։
Նա ավելացրել է, որ Հայաստանն իր հերթին մշտապես եղել է Ռուսաստանի գործընկերն ու բարեկամը։
«Կարծում եմ, որ հետագայում աշխատելու նոր ձևեր կգտնենք, քանի որ մենք պետք է ավելի լայն շփումներ ունենանք։ Ավելի ընդգրկուն կապերը միայն օգուտ կբերեն մեր երկու պետություններին», – ասել է ՀՀ ԱԺ խոսնակը։
Վոլոդինը նույնպես նշել է, որ պետք է երկու խորհրդարանների փոխգործակցության նոր ձևաչափ գտնել։
«Մեր կապերն իսկապես շատ ամուր են։ Մենք հասկանում ենք միմյանց, կարող ենք խոսել մեզ անհանգստացնող ցանկացած հարցի շուրջ», – նշել է Պետդումայի նախագահը։
Նրա կարծիքով` ճիշտ է կլինի կատարելագործել աշխատանքի ձևաչափն ու մեթոդները, որոնք նոր ձևաչափ կհաղորդեն երկու երկրի հարաբերություններին։
