ԵՐԵՎԱՆ, 8 հունիսի-Sputnik. Ժողովուրդը պետք է տեսնի, որ չեն կրակում, սադրանքներ չկան։ Միայն այս դեպքում Մինսկի խմբի համանախագահների ջանքերը կլինեն տեսանելի։ Այս մասին կառավարության նիստից հետո խոսեց փոխարտգործնախարար Շավարշ Քոչարյանը։ Նա խոսեց նաև պատերազմի վերսկսման հավանականության մասին։
«Իրականում պատերազմի մասին խոսակցությունները նոր չեն, տարիներ շարունակ Բաքուն այս սուրն անընդհատ ճոճում է, այն քայլերը, որ իրականացրել է շփման գծում, բարձրացրել է լարվածությունը, մտահոգություն է պահանջում։ Ապակայունացումը, իմ գնահատականով, տարածաշրջանում ոչ մեկին պետք չէ»,-ասաց Քոչարյանը։
Անդրադառնալով հարցին, թե այն բանից հետո, երբ մահմեդական 10 պետություն խզեցին դիվանագիտական հարաբերությունները Կատարի հետ, ի՞նչ դիրքորոշում պետք է ունենա այս հարցում Հայաստանը, Քոչարյանն ասաց. «Կատարը հերթական պետություններից է, շուտով կլինի ևս 6 պետություն, որոնց հետ կազատականացնենք վիզային ռեժիմը։ Մենք ունենք մի ընդհանուր ծրագիր` կապված մուտքի արտոնագրերի ազատականացման հետ։ 10 պետություն խզել է հարաբերությունները Կատարի հետ։ Նախ, դա կապված է այն միտումների հետ, որ կան Սաուդյան Արաբիայում։ Բացի այդ, սուննի պետություն Կատարը չի միանում այն կոալիցիային, որն ուղղված է Իրանի դեմ, Կատարն ավելի հակված էր համագործակցության»։
Հիշեցնենք, որ կառավարության որոշմամբ` ազատականացվել է Կատարի հետ վիզային ռեժիմը։ Այլ կերպ ասած` Կատարի քաղաքացիները Հայաստան կարող են գալ առանց վիզայի թույլտվության։ Իսկ մայիսի 14-ին ՀՀ նախագահ Սերժ Սարգսյանն այցելել էր Կատար և հանդիպում ունեցել «Կատար Էյրվեյս» ընկերության գործադիր տնօրեն Աքբար Ալ Բաքրի հետ:
Փոխարտգործնախարարը խոսեց նաև Իրանում տեղի ունեցած ահաբեկության մասին։ Sputnik Արմենիայի հարցին, թե արդյոք հարևան երկրում տեղի ունեցող ահաբեկությունը վտանգ չի ներկայացնում Հայաստանի համար, Քոչարյանը պատասխանեց` որևէ երկիր երաշխավորված չէ, ապահովագրված չէ, այն, ինչ տեղի ունեցավ Իրանում, հուշում է, որ պետությունները պետք է համագործակցեն։
