ԵՐԵՎԱՆ, 6 հունիսի — Sputnik. Աշխարհով մեկ համացանցի օգտատերերին գրավող կիբերհանցագործների «անվճար տոմսերի» մասին հայտարարության նոր խայծը կերան նաև հայ օգտատերերը։ Այդ մասին Sputnik Արմենիային ասաց տեղեկատվական անվտանգության փորձագետ Սամվել Մարտիրոսյանը։
Վերջերս հաքերներն «Աերոֆլոտ», Emirates, KLM, Air France և Lufthansa խոշոր ավիաընկերությունների անունից անվճար տոմսեր էին խաղարկում։ Միամիտ օգտատերերին խարդախներն առաջարկում էին տոմսեր շահել, իսկ այդ հղումով գնացողի համակարգչի մեջ վտանգավոր վիրուս էր ընկնում։
Այդպիսով, Facebook-ի օգտատերերն իրենց տվյալները փոխանցում էին հաքերներին, որոնք հետագայում օգտագործվում են «վիրուսային հղումների» տարածման համար։
«Ցավոք, խարդախներին հավատացել է մարդկանց մի հոծ զանգված։ Ընդ որում, նրանց թվում մեծ է նաև կրթված մարդկանց թիվը, որոնք, եթե ավելի զգոն լինեին, կարող էին խարդախություն տեսնել այդ ամենի մեջ։ Հայաստանի համար վիճակագրություն չունեմ, սակայն դատելով նրանից, ինչ տեսել եմ Facebook-ի իմ էջում, Հայաստանում մի շարք մարդիկ իրենց համակարգիչների կամ գաջեթների վրա վիրուսներ են ավելացրել», – ասաց Մարտիրոսյանը։
Պատասխանելով այն հարցին, թե արդյոք հայ օգտատերերը ավելի զգոն չեն դարձել վերջին զանգվածային հարձակումներից հետո` Մարտիրոսյանը նշեց, որ նոր վիճակագրությունը ցույց է տալիս, որ իրավիճակն, ընդհանուր առմամբ, երկրում բարելավվում է։
«Սակայն այդ ցուցանիշները դեռ հեռու են իդեալական լինելուց», – ավելացրեց նա։
Փորձագետը նշեց նաև, որ նոր վիրուսը տարածել էին ամբողջ աշխարհում, տարբեր լեզուներով։
