ԵՐԵՎԱՆ, 5 մայիսի — Sputnik, Արմենուհի Մխոյան. Երկարատև բոյկոտից հետո «Հայկական վերածնունդ» կուսակցության` Գյումրու ավագանու անդամները հունիսի 5-ին վերջապես մասնակցեցին ավագանու նիստին: Այս նստաշրջանի վերջին նիստին «Բալասանյան» դաշինքի ավագանու անդամներին միացան նաև «Հայկական վերածնունդ» կուսակցության 4 անդամները՝ Հասմիկ Եղիազարյանը, Սաշա Մարտիրոսյանը, Ավետիս Առաքելյանը և Հենրիկ Պողոսյանը:
Նշենք, որ ՏԻՄ ընտրություններից հետո ավագանու նիստերն անցնում էին միայն «Բալասանյան» դաշինքի ներկայությամբ: «ԳԱԼԱ»-ն, ԲՀԿ-ն և «Հայկական վերածնունդը», ավագանու մանդատների բաշխումը բոյկոտելով, բացակայում էին նիստերից: «Բալասանյան» դաշինքի մանդատների թիվը թույլ էր տալիս քվորում ապահովել և ավագանու նիստեր անցկացնել:
Մինչ ավագանու բուն հարցերի քննարկմանն անցնելը Գյումրու քաղաքապետ Սամվել Բալասանյանը ներկայացրեց ԲՀԿ-ից ավագանու անդամ ընտրված Վարդևան Գրիգորյանի՝ ավագանու անդամի լիազորությունները վաղաժամկետ դադարեցնելու մասին դիմումը՝ հիմք ընդունելով այն, որ Վարդևան Գրիգորյանը ընտրվել է ՀՀ ԱԺ պատգամավոր և չի կարող միաժամանակ լինել նաև Գյումրու ավագանու անդամ և համատեղել այդ երկուսը:
«Այս պահին մենք սպասում ենք թիվ 31 տարածքային ընտրական հանձնաժողովի որոշմանը, որը կլինի այսօրվա ընթացքում»,- նշեց Սամվել Բալասանյանը` ներկայացնելով մեկ այլ փաստաթուղթ ևս, որ տրամադրել է իրավաբանական բաժինը և վերաբերում է ավագանու նիստերից անհարգելի բացակայած 16 ավագանու անդամների լիազորությունների վաղաժամկետ դադարեցմանը։
«Սա լիովին համապատասխանում է տեղական ինքնակառավարման մասին ՀՀ օրենքի 18-րդ, 14-րդ, 70-րդ հոդվածների համապատասխան կետերին և Գյումրու ավագանու կանորակարգի դրույթներին, սակայն ես որոշեցի այս նիստի ընթացքում հարցն ընթացք չտալ, նախագիծը չմտցնել ավագանու նիստի օրակարգ և ժամանակ տալ նիստերից բացակայած անդամներին ներկայացնել համապատասխան փաստաթղթեր իրենց բացակայությունները հարգելի որակելու համար։ Հարցը փոխանցվում է ավագանու հաջորդ նիստ, որը կկայանա սեպտեմբերին»,- նշեց Բալասանյանը՝ կրկին անգամ ողջունելով «Հայկական վերածնունդ» կուսակցության ավագանիների ներկայությունը և հորդորելով մյուսներին հետևել նրանց քայլին:
Ի դեպ, «Հայկական վերածնունդ» կուսակցությունը Գյումրու ավագանու նիստին «խերով» է մտնում: Բալասանյանը բոլորի անունից շնորհավորեց «Հայկական վերածնունդ» կուսակցության անդամ Ավետիս Առաքելյանին, քանի որ հենց նույն օրը ծնվել է նրա երկրորդ արու զավակը:
ՀՎԿ անդամ Հասմիկ Եղիազարյանը խոսեց իրենց բացակայաությունների մասին։
«Մինչև հիմա չէինք մասնակցում, քանի որ խնդիր ունեինք, և այդ խնդիրը պետք է լուծվեր դատական կարգով։ Սպասում էինք սահմանադրական դատարանի վերջնական որոշմանը։ Այսօր հարցը լուծվել է: Մարտից հետո այլ խնդիրներ էլ կային՝ ներկուսակցական։ Հիմա արդեն այդ խնդիրները նույնպես լուծվել են, և մենք կմասնակցենք ավագանու նիստերին»,- նշեց նա՝ փաստելով, որ կար ստորագրված փաստաթուղթ մյուս երկու կուսակցությունների` «ԳԱԼԱ»-ի և ԲՀԿ-ի հետ` նիստերին չմասնակցել մինչև սահմանադրական դատարանի որոշումը։ Սակայն դրանից հետո իրենք ունեին ինքնուրույն որոշում կայացնելու իրավունք, որից և օգտվել են։
Իսկ թե ավագանու նիստերին ՀՎԿ-ն ինչպիսի դիրք կընդունի, Եղիազարյանը նշեց` կախված է հետագա աշխատանքների ընթացքից։
«Նայած թե ավագանին իր քաղաքական գիծն ինչպես կտանի»,- ասաց նա:
Գյումրու ավագանու քննարկմանն այս անգամ ներկայացվել էր 24 հարց, որոնք բոլորը ձայների 90 տոկոսի «կողմ» քվեարկությամբ հաստատվեցին: Նշենք, որ «Հայկական վերածնունդի» 4 ներկայացուցիչներից մեկը` Ավետիս Առաքելյանը, չսպասեց նիստի ավարտին և չմասնակցեց քվեարկությանը, 2 ներկայացուցիչները հարցերի մեծ մասին «ձեռնպահ» քվեարկեցին, իսկ երրորդն էլ հավանաբար նիստին առաջին անգամ մասնակցելու պատճառով ընդհանրապես մոռանում էր քվեարկել։
