ԵՐԵՎԱՆ, 18 մայիսի — Sputnik. Հայ գրոսմայստեր Լևոն Արոնյանի կինը` ֆիլիպինուհի Արիանա Կաոիլին, ցուցադրել է հայերենի հմտությունները։
Համացանցում հրապարակվել է մի տեսանյութ, որում նա կարդում է Համո Սահյանի «Ախր ես ինչպե՞ս վեր կենամ, գնամ» բանաստեղծությունը։
Բանաստեղծության վերջում «առանց ինձ» բառակապակցության փոխարեն ասում է «առանց քեզ»` հավանաբար խոսքն ուղղելով սիրելիին։
Արիանան ամուսնու հետ ապրում է Երևանում։ Նա բազմաթիվ անգամ է խոստովանել, որ սիրում է հայկական մշակույթն ու պատմությունը։ Այժմ նա նաև հայերեն է սովորում։
Իր հարցազրույցներից մեկում խոստովանել է, որ դեռ 9-11 տարեկանում է հրապուրվել հայոց պատմությամբ։ Շախմատի առաջին ուսուցիչը հայ է եղել, իսկ ամուսնուն` Լևոն Արոնյանին, հանդիպել է շախմատային մրցաշարերից մեկի ժամանակ։
Այդ ժամանակից ի վեր Հայաստանի հետ կապն ավելի է ջերմացել։ Նա նույնիսկ բարձրացել է Արարատ լեռն ու հայկական դրոշ ծածանել բիբլիական լեռան գագաթին։